Sarkozinin həbsinə Fransa parlamentində sərt reaksiya: millət vəkilləri iki yerə bölünüb
Paris, 22 oktyabr, AZƏRTAC
Fransanın sabiq Prezidenti Nikola Sarkozi Liviya maliyyələşməsi işi üzrə cinayətkar dəstə ilə əlbir olmaq ittihamı üzrə oktyabrın 21-də Parisdəki “Santé” həbsxanasına yerləşdirilib. Bu, V Respublika tarixində bir ilkdir: indiyə qədər heç bir keçmiş prezident həbs olunmayıb. Hadisə dərhal Milli Assambleyada ciddi rezonans doğurub və millət vəkilləri bu məsələ ilə bağlı fərqli fikirlər bildiriblər.
AZƏRTAC xəbər verir ki, N.Sarkozinin qurucusu olduğu Respublikaçılar Partiyası (Les Républicains) onun həbsini haqsız və ədalətsiz hesab edib. Partiyanın deputatı Mari-Kristin Dalloz sabiq prezidentin həbsxanaya gətirildiyi görüntüləri görəndə sarsıldığını bildirib. "Bu gün mən Nikolya Sarkozini dəstəkləyirəm. Ailəsini və yaxın ətrafını düşünürəm, onlar üçün bu vəziyyət çox ağırdır", - deyə sağçı deputat deyib. O, həmçinin bu iş üzrə aparılan məhkəmə araşdırmasının obyektivliyini şübhə altına alıb və araşdırmanın maliyyə dəyəri ilə bağlı parlament komissiyası yaratmağı təklif edəcəyini bildirib.
Radikal sağçı Milli Birlik Partiyası (RN) da Sarkozinin tərəfindədir. Partiyanın deputatı Sebastyən Şenyü sabiq prezidentə cəsarət arzulayaraq, onun həbs olunmasının Fransa üçün utandırıcı görüntü olduğunu deyib. "Bu, Fransa üçün gözəl bir mənzərə deyil. Hakimlərin keçmiş prezidentə qarşı bu cür davranışı yersizdir", - deyə S.Şemyü bildirib.
Bu arada RN lideri Marin Lö Pen də məhkəmə qərarı ilə üz-üzədir. O, Avropa parlamentində saxta məşğulluq işi üzrə siyasi fəaliyyətə qadağa cəzası alıb və onun da işi hazırda məhkəmə prosesindədir.
Solçu partiyalar isə bu vəziyyəti ədalət sisteminə qarşı "seçici münasibətin" nümunəsi kimi qiymətləndirirlər. “Əyilməz Fransa” (La France insoumise) hərəkatının deputatı Uqo Bernalisis həbsin sağçılar tərəfindən yalnız indi narahatlıq doğurmasına toxunaraq bildirib ki, məsələ özlərindən birinə aid olanda, birdən-birə həbsxana onlara maraqlı gəlir. Müvəqqəti həbs qərarı onları emosional vəziyyətə salıb". O, bu hadisədən istifadə edərək, cəmiyyətə Fransa həbsxanaları haqqında məlumat vermək və həbsxana sisteminin real vəziyyətini göstərmək lazım olduğunu deyib. Deputat, həmçinin qeyd edib ki, Santé həbsxanası normadan iki dəfə artıq məhbus saxlayır, bu isə Fransa penitensiar sisteminin vəziyyətinə dair ciddi suallar doğurur.
Sarkozinin həbsi Fransa siyasi arenasında kəskin bölünmə və qızğın debatlara səbəb olub. Sağçılar və ifrat sağçılar sabiq prezidenti müdafiəsində duraraq qərarı tənqid edirlər. Solçular isə ədalətin hər kəs üçün eyni olduğunu və bu hadisənin hüquq sistemindəki problemləri gündəmə gətirdiyini vurğulayırlar.
Bu hadisə Fransa siyasətində ədalət, bərabərlik və məsuliyyət anlayışlarının necə dəyərləndirilməsi ilə bağlı sualı bir daha aktuallaşdırır.
Bölmənin digər xəbərləri
