Şəhidlər xiyabanını ziyarət etmək bizim mənəvi borcumuzdur
Bakı, 20 yanvar (AZƏRTAC). Artıq 22 ildir ki, xalqımız 20 Yanvar gününü ümumxalq hüzn günü kimi böyük izdihamla, şəhidlərimizin ruhuna layiq bir şəkildə qeyd edir. Havanın soyuqluğuna baxmayaraq 20 Yanvar şəhidlərinin xatirəsini anmaq, onların müqəddəs ruhları qarşısında öz vətəndaşlıq borcumuzu qismən də olsa ödəmək bizim mənəvi borcumuzdur.
Bu sözləri AZƏRTAC-a müsahibəsində Azərbaycan Kooperasiya Universitetinin müəllimi Aydın Mirzəməmmədov demişdir. Bildirmişdir ki, bu insan selinə qoşulub müqəddəs məkana doğru üz tutanların sırasında tələbələr və gənclər çoxluq təşkil edir. Onlar mənsub olduqları xalqın böyüklüyünü, müdrikliyini bir daha gözləri ilə görmək üçün buraya gəlmişlər. Təbii ki, 20 Yanvar şəhidlərinin qəhrəmanlığı bizim qürur mənbəyimizdir. 20 Yanvar tarixə matəm günü kimi düşsə də, biz artıq öz azadlığımıza nail olmuşuq. Şəhidlərimizlə qürur duyuruq və onların müqəddəs məzarlarını ziyarət etmək hər bir azərbaycanlının mənəvi borcudur.
Bölmənin digər xəbərləri
