Şəkidə Xocalı faciəsinin iyirminci ildönümü ilə əlaqədar silsilə tədbirlər keçirilir
Şəki, 21 fevral (AZƏRTAC). Bəşəriyyət tarixinin ən dəhşətli kütləvi terror hadisələrindən olan Xocalı soyqırımının iyirminci ildönümü ilə əlaqədar Şəkidə silsilə tədbirlərin keçirilməsinə başlanılmışdır.
AZƏRTAC xəbər verir ki, faciənin ildönümünün keçirilməsinə hazırlıq məqsədilə təsdiq olunmuş tədbirlər planına uyğun olaraq, hazırda rayonun ali, orta ixtisas və ümumtəhsil məktəblərində, kitabxanalarda, ayrı-ayrı əmək kollektivlərində, kənd və qəsəbələrdə anma mərasimləri, “dəyirmi masa”lar, konfranslar keçirilir, rəsm, kitab sərgiləri və guşələr təşkil olunur. Keçirilən tədbirlərdə Xocalı soyqırımının acı nəticələri bir daha xatırlanır, ermənilərin xalqımıza qarşı həyata keçirdikləri işğalçılıq siyasətinin gətirdiyi faciələrdən söhbət açılır.
Fevralın 24-də rayonun bütün təhsil müəssisələrində ilk dərslər Xocalı soyqırımına həsr olunacaqdır. Bundan əlavə, rəsm qalereyasında faciənin dəhşətlərini əks etdirən sərgi təşkil olunacaq, şəhər icra hakimiyyətində Xocalıdan olan məcburi köçkünlərlə görüş keçiriləcək, onlara yardım göstəriləcəkdir.
Fevralın 25-də şəhər icra hakimiyyətində ümumrayon anma mərasimi keçiriləcək, soyqırımı qurbanlarının xatirəsi yad ediləcəkdir.
Bölmənin digər xəbərləri
