SEMİPALATİNSK POLİQONUNUN BAĞLANMASINDAN 15 İL KEÇİR
Ölümsaçan nüvə silahından könüllü surətdə imtina edilməsi təkcə yeni yaranan gənc dövlət üçün deyil, mübaliğəsiz demək olar ki, bütün dünya birliyi üçün son dərəcə mühüm addım idi. 1989-cu ildə nüvəsiz dünyaya tərəfdar olan Qazaxıstan xalqı Semipalatinsk poliqonunda planlaşdırılan 18 partlayışdan 11-ni dayandırdı və bu torpaqda insanlığa zidd eksperimentə həmişəlik son qoydu.
Hazırda nüvə silahının yayılmaması məsələləri ölkənin beynəlxalq siyasətinin öncül istiqamətlərindəndir. İndi Qazaxıstan kütləvi qırğın silahından istifadəni, onun istehsalını, yayılmasını, saxlanmasını, ötürülməsini və hazırlanmasını qadağan edən və ya məhdudlaşdıran, demək olar, bütün beynəlxalq sazişlərin və konvensiyaların iştirakçısıdır.
Astana Mərkəzi Asiyada nüvə silahından azad zonanın yaradılması prosesində fəal iştirak edir. Sentyabrda Semipalatinskdə Qazaxıstan, Qırğızıstan, Tacikistan və Özbəkistanın xarici işlər nazirləri müvafiq müqavilə imzalamaq niyyətindədirlər.
Semipalatinsk poliqonunun 15 ildir bağlanmasına baxmayaraq, 40 illik nüvə sınaqlarının nəticələrindən hələ gələcək nəsillər də əziyyət çəkəcəklər. Bu gün sağlamlığın bərpa olunması, zəhərlənmiş ərazilərin əkin üçün yararlı hala salınması, postkonversiya proseslərinin maliyyələşdirilməsi region əhalisinin ümdə problemlərindəndir. Ölkə hökuməti keçmiş Semipalatinsk poliqonu problemlərinin kompleks həllinə dair Dövlət Proqramı işləyib hazırlamışdır. Proqram çərçivəsində infrastrukturu inkişaf etdirmək, adamların kiçik və orta sahibkarlıqla məşğul olmasına şərait yaratmaq, yeni obyektlər tikmək nəzərdə tutulur.
Bölmənin digər xəbərləri
