Sərdar Ünsal: Sovet tankları Azərbaycanın müstəqillik atəşini söndürə bilmədi
Bakı, 21 yanvar (AZƏRTAC). Türkiyə-Azərbaycan Dərnəyinin İğdır vilayəti üzrə təmsilçisi, iğdırlı jurnalist Sərdar Ünsal 20 Yanvar hadisələrinin 22-ci ildönümü ilə bağlı məlumat yaymışdır. Məlumatda 20 Yanvar hadisələrində sovet imperiyasının əsl üzünün, mərhəmətsizliyinin və vəhşiliyinin ortaya çıxdığı diqqətə çatdırılır.
S.Ünsal AZƏRTAC-a bildirmişdir ki, 20 Yanvar hadisələri zamanı sovet tanklarının Azərbaycanda günahsız insanları qətlə yetirməsi tarixdə qara ləkə olaraq qalacaqdır. Bu qanlı hadisə təkcə azərbaycanlıların deyil, bütün türk dünyasının qəlbində nifrət hissi oyatmışdır. Müstəqillik istəyən bir millətə heç bir əngəl törədilə bilməz. Tanklar Azərbaycanın müstəqillik atəşini söndürə bilmədilər. Minlərlə insanın Azaldıq meydanından başlanmış müstəqillik hərəkatı bugünkü müstəqil Azərbaycan dövlətinin təməlini qoymuşdur.
S.Ünsal qeyd etmişdir ki, 20 Yanvar həm rus imperiyasının əsarətindən xilas olma günü, həm də azadlıq mübarizəsi günüdür. Azərbaycan xalqının hüzn və şərəf günü olan 20 Yanvar hadisələri zamanı həlak olmuş vətən oğullarını heç bir zaman unutmayacağıq. Azərbaycanın müstəqilliyi daimi olacaqdır. Hər zaman, hər yerdə üçrəngli bayraq dalğalanacaqdır.
Bölmənin digər xəbərləri
