Şərh: Dili qoruyub saxlamaq – milləti qoruyub saxlamaq deməkdir
Bakı, 13 noyabr, Günel Alıyeva, AZƏRTAC
Hər bir alınma söz və ya yanlış işlədilən ifadə ortaq dil yaddaşımızda kiçik bir ləkə kimidir. Dili qoruyub saxlamaq – milləti qoruyub saxlamaq deməkdir. Məhz buna görə də gənc nəsil bu məsuliyyəti daha dərindən dərk etməlidir: dil yaşadıqca, millət də yaşayır.
Bu barədə AZƏRTAC-ın müxbirinə verdiyi müsahibədə gənc yazıçı Ləman Vəli danışıb.
Onun sözlərinə görə, həm yazıçı, həm də özəl sektorda insan resursları üzrə aparıcı mütəxəssis kimi çalışaraq, nitqin təmizliyini qorumağın nə dərəcədə çətin olduğunu hər gün hiss edir: “Mühitimizdə daim korporativ və xarici terminlərin axını ilə qarşılaşırıq. Bir çoxları ingilisdilli formalara üstünlük verirlər – bəzən rahatlıqdan, bəzən də vərdişdən”.
O, həmçinin etiraf edib ki, dəqiq ekvivalenti olduğu hallarda Azərbaycan sözlərini şüurlu şəkildə seçir və bunu ətrafdakılara daim xatırlatmağa çalışır:
“Bəzən bu, qeyri-adi səslənir, amma mənim üçün dilimizin zənginliyini və ifadəliliyini itirməmək vacibdir. Bu, sadəcə peşəkar prinsip deyil – daxili dəyərdir. Mənim üçün dilin saflığını qorumaq həm peşəkar məsuliyyət, həm də bir parçası olduğum mədəniyyətə qarşı yaradıcı bir borcdur”.
Bölmənin digər xəbərləri
