Şərurda balıqçılığın yeni mərhələsi: Arpaçay Balıqçılıq təsərrüfatında 50 ton balıq istehsal ediləcək VİDEO
Naxçıvan, 26 avqust, AZƏRTAC
Prezident İlham Əliyevin 2026-cı il 25 may tarixli Sərəncamı ilə təsdiqlənən “Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026–2030-cu illər üçün Dövlət Proqramı” ölkədə digər sahələrlə yanaşı, balıqçılıq və akvakultura sektorunun inkişafında yeni mərhələnin əsasını qoyub. Proqramın başlıca məqsədləri istehsalın artırılması, daxili tələbatın daha dolğun ödənilməsi, ixrac potensialının genişləndirilməsi və müasir istehsal modelinin formalaşdırılmasıdır.
Sənəddə balıqçılıq və akvakultura sahəsi üzrə konkret hədəflər müəyyənləşdirilib. Belə ki, 2030-cu ilədək balıq istehsalının 7,7 min tona çatdırılması, ölkənin özünütəminetmə səviyyəsinin yüksəldilməsi və ixrac imkanlarının genişləndirilməsi nəzərdə tutulur. Bu məqsədlərə nail olmaq üçün qanunvericilik bazasının təkmilləşdirilməsi, dövlət dəstəyi mexanizmlərinin formalaşdırılması, subsidiya və güzəştlərin tətbiqi, həmçinin balıqartırma fəaliyyətinin genişləndirilməsi istiqamətində kompleks tədbirlər həyata keçiriləcək. Dövlət Proqramının Naxçıvan Muxtar Respublikasında da uğurlu icrası üçün mühüm tədbirlərin həyata keçirilməsi planlaşdırılır və artıq Şərur rayonunda bu istiqamətdə mühüm addımlar atılıb, bir sıra balıqçılıq təsərrüfatlarının fəaliyyəti bərpa olunmaqdadır.
AZƏRTAC-ın bölgə müxbiri xəbər verir ki, həmin təsərrüfatlardan biri də rayonun Dizə kəndində yerləşən Arpaçay Balıqçılıq Təsərrüfatıdır. 2010-cu ildə yaradılan təsərrüfatda 2019-cu ildə bərpa işləri aparılıb. Həmin il yerli sazan balıqlarının təbii şəkildə artırılması və mayalanması həyata keçirilib, damazlıq balıqlar saxlanılıb. Müəyyən coğrafi amillər səbəbindən sonrakı illərdə təsərrüfatın fəaliyyətində durğunluq yaransa da, hazırda burada yenidən genişmiqyaslı yenidənqurma işləri görülür.
Təsərrüfatın sahibi Elvin Mirzəyev AZƏRTAC-a müsahibəsində bildirib ki, bu ilin iyun ayının əvvəlindən göllərə 350 min ədəd amur və sazan balığı körpəsi buraxılıb. Hazırda balıq körpələrinin çəkisi 3–5 qram civarındadır.
Onun sözlərinə görə, Arpaçay suyu minerallarla zəngin olmaqla yanaşı, yüksək oksigen göstəricisinə malikdir. Suyun bir litrində 11–12 milliqram oksigenin olması balıqların yetişdirilməsi üçün əlverişli şərait yaradır. Xüsusilə forel balığının inkişafı üçün tələb olunan 8–9 milliqram oksigenlə müqayisədə bu göstərici təsərrüfat üçün mühüm üstünlük hesab olunur.
Ümumilikdə Arpaçay Balıqçılıq Təsərrüfatı 5 göl və 16 yetişdirmə hovuzundan ibarətdir. Təsərrüfatda növbəti mövsümdə forel istehsalının artırılması planlaşdırılır. Belə ki, iki göldə ümumilikdə 96 tona yaxın forel yetişdirilməsi nəzərdə tutulur. Mayalanmış balıq yumurtaları həmin hovuzlarda inkubasiya ediləcək, balıq körpələri 3–5 qram çəkiyə çatdıqdan sonra digər göllərə köçürülərək böyüdüləcək.
Elvin Mirzəyev bildirib ki, növbəti mövsümdə iki göldə ən azı 50 ton balıq istehsalı planlaşdırılır. Forellərin 300–400 qram çəkiyə çatdırıldıqdan sonra satışa çıxarılması nəzərdə tutulur. Satışın həm təsərrüfatda, həm də bazarlarda həyata keçirilməsi planlaşdırılır.
Təsərrüfatda sazan və amur balıqlarının yetişdirilməsinə də xüsusi diqqət yetirilir. Bu balıqların 1,5–2 kiloqram çəkiyə çatdıqdan sonra satışa çıxarılması nəzərdə tutulur. Bunun üçün təxminən 1–1,5 il vaxt tələb olunur. Hazırda sazan və amurların yemlənməsində təbii yemlərdən istifadə edilir.
Onun sözlərinə görə, forellərin qidalanmasında əsasən təbii yem mənbələrindən istifadə edilir. Bu amil balıqların keyfiyyətinə və dadına müsbət təsir göstərəcək.
Elvin Mirzəyev qeyd edib ki, “Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026–2030-cu illər üçün Dövlət Proqramı”nın qəbulundan sonra bu sahəyə diqqət daha da artıb: "Aidiyyəti dövlət qurumlarının nümayəndələri təsərrüfata dəfələrlə baş çəkərək görülən işlərlə maraqlanıblar və müvafiq tövsiyələr veriblər. Proqramın qəbulu və yaradılan imkanlara görə dövlətimizə minnətdarlıq edirəm".
"Arpaçay Balıqçılıq Təsərrüfatının yerləşdiyi ərazi tarixi baxımdan da əhəmiyyətlidir. Təsərrüfat Oğlanqala və Dizə qədim yaşayış komplekslərinin arasında yerləşir. Bu amil gələcəkdə burada turizmin inkişafı baxımından mühüm rol oynaya bilər",- deyə təsərrüfat sahibi əlavə edib.
Arpaçay Balıqçılıq Təsərrüfatında həyata keçirilən işlər Naxçıvanda balıqçılıq və akvakultura sahəsinin inkişafı üçün mövcud potensialın real nəticələrə çevrildiyini göstərən nümunəvi addım kimi qiymətləndirilir. Təsərrüfatın yenidən fəaliyyətə başlaması, balıqçılığın müasir tələblər əsasında genişləndirilməsi, yerli balıq növlərinin artırılması və forel istehsalının inkişaf etdirilməsi həm daxili bazarın təminatına, həm də gələcəkdə bölgənin ixrac imkanlarının genişlənməsinə töhfə verəcək. Arpaçayın zəngin su ehtiyatları, əlverişli təbii şəraiti və ərazinin tarixi-mədəni əhəmiyyəti isə burada akvakultura ilə yanaşı, turizmin inkişafı üçün də geniş imkanlar yaradır. Beləliklə Dövlət Proqramının qarşıya qoyduğu hədəflər fonunda Arpaçay Balıqçılıq Təsərrüfatının fəaliyyətinin genişləndirilməsi Naxçıvanda balıqçılıq və akvakultura sektorunun inkişafına verilən mühüm töhfələrdən olacaq.
Müxbir - Nail Əsgərov
Bölmənin digər xəbərləri
