Səttar Möhbalıyev: Avropa Parlamentinin məlum qətnaməsi riyakarlığın davamıdır
Bakı, 6 oktyabr, AZƏRTAC
Avropa Parlamentinin yüngül, bir o qədər də dayaz və özünü biabır edən qərarları bizə çoxdan məlumdur. Biz beynəlxalq hüququn hansı gücə sahib olduğunu, kimlərin əlində oyuncağa çevrildiyini çox yaxşı bilirik. Bu gün Azərbaycanın ərazi bütövlüyünü bərpa etməsindən əndişə keçirən, yeri gəldi-gəlmədi yersiz bəyanatlar səsləndirən, hətta buna görə yuxusu ərşə çəkilən dövlətləri 30 il ərzində münaqişənin sülh yolu ilə həlli prosesinə cəlb etmişdik. Amma nəticədə nə gördük?! Əllərindən bir iş gəlmədi, yalnız mənasız danışıqlar apardılar, bir milyondan artıq məcburi köçkünün hüquqlarını təmin etmək barədə düşünmədilər. Baxmayaraq ki, hər şey göz qabağında idi. İndi durub onların insan hüquqları ilə bağlı hansı fikrinə inanmaq olar?! Bəs niyə o zaman beynəlxalq hüquqa istinad etmirdiniz!? Məgər BMT-nin məlum qətnamələrini özünüz qəbul etməmişdiniz!? Vaxtı 30 il uzatmaqla fikriniz nə idi? Elə bilirdiniz ki, Azərbaycan torpaqlarını Ermənistana ərməğan edəcəksiniz!? İşğalçı, azərbaycanlılara qarşı soyqırımları törətmiş Ermənistanın havadarları, siz məğlub oldunuz. Müzəffər Ali Baş Komandan İlham Əliyevin rəhbərliyi ilə Azərbaycan Ordusu sizin dəstəklədiyiniz təcavüzkar dövlətin bütün işğal planlarını puç etdi, bölgəni bataqlıqdan xilas etdi, yeni vəziyyət formalaşdırdı. İstəsəniz də, istəməsəniz də bu reallıqları qəbul etməyə məcbursunuz, çünki bu reallıq dəyişməzdir, beynəlxalq hüquqa əsaslanır, sülhə və təhlükəsizliyə, tərəqqiyə, yeni inkişafa istiqamətlənib.
Bu fikirləri Avropa Parlamentinin qərəzli qətnaməsinə münasibət bildirən Azərbaycan Həmkarlar İttifaqları Konfederasiyasının sədri, Milli Məclisin deputatı Səttar Möhbalıyev AZƏRTAC-a açıqlamasında deyib.
Bu qətnamənin qəbul edilməsinin Avropa Parlamenti üzvlərinin, sənədin lehinə səs verənlərin nəinki bölgədəki proseslərdən, heç dünyadan da xəbərləri olmamasını göstərdiyini vurğulayan deputat qeyd edib: “Nə qədər gülünc olsa da, qətnamədə iddia edilib ki, bölgədə beynəlxalq hüququn norma və prinsipləri pozulub. Yaxşı, iddianızda haqlısınızsa, çox yox, bununla bağlı bir faktı ortaya qoyun ki, Azərbaycan beynəlxalq hüququ pozub. Nə qədər utanmaz və abırsız olasan ki, beynəlxalq hüquqdan danışasan. Onu bütün məsələlərdə ayaqlar altına atan siz deyilsiniz!? Dünyanın müxtəlif yerlərində qərəzli mövqelərini yeritmək üçün beynəlxalq hüquqa geyindirmədikləri don qalmayıb. Həmçinin “etnik təmizləmə”dən danışırlar. Guya Azərbaycan Qarabağda “etnik təmizləmə” aparıb. İnsanların ərazidən könüllü şəkildə getmələri hamının gözü qarşısında baş verdi. Yeri gəlmişkən, yuxarıda da qeyd etdiyim kimi, 30 il əvvəl Ermənistanın azərbaycanlılara qarşı apardığı etnik təmizləməni görməmişdiniz!? Daha əvvəl isə bu siyasət əzəli Azərbaycan torpaqları olan və indi Ermənistan adlanan ərazidə həyata keçirilib. 200 minə yaxın insan ata-baba yurdlarından didərgin salınıb, əmlakları mənimsənilib. İndi biz sizin gözünüzə hansı ölçüdə eynək taxaq ki, bu həqiqətləri görə biləsiniz!?”
Azərbaycanın yürütdüyü siyasətin beynəlxalq hüquqa əsaslandığını vurğulayan Səttar Möhbalıyev bildirib: “Təbii ki, Avropa Parlamentinin bu utanmaz, mənasız, rüşvət qoxuyan qətnaməsi Azərbaycan dövlətini haqq yolundan döndərə bilməz. Bizim yolumuz əsl beynəlxalq hüquqa əsaslanır. Avropa Parlamentinin üzvlərinə tövsiyə edərdim ki, erməni lobbisinin çaldığı havalara oynayaraq özlərini gözdən salmasınlar”.
Bölmənin digər xəbərləri
