Səudiyyə Ərəbistanı Suriya ilə aviareysləri və konsulluq xidmətlərini bərpa edir
Bakı, 13 aprel, AZƏRTAC
Ciddədə Səudiyyə Ərəbistanı və Suriya arasında münasibətlərin normallaşması üzrə danışıqlar aparılıb. AZƏRTAC Saudi Press agentliyinə istinadla xəbər verir ki, iki ölkənin xarici işlər nazirləri arasında keçirilən görüşdən sonra verilən birgə bəyanata görə, iki ölkə böhrana siyasi həll yolu axtarmağa söz verib.
Səudiyyə Ərəbistanının xarici işlər naziri şahzadə Faysal bin Fərhan və Suriyanın xarici işlər naziri Faysal Mekdad Suriyanın birliyi, təhlükəsizliyi, sabitliyi və ərazi bütövlüyünü müzakirə ediblər. Məlumata görə, nazirlər iki ölkə arasında konsulluq xidmətlərinin və aviareyslərin bərpası üçün proseduraların başlanmasını alqışlayıblar. Tərəflər, həmçinin Suriyanın humanitar problemlərinin həllinin və yardımın ölkənin bütün bölgələrinə çatması üçün uyğun mühitin yaradılmasının vacibliyi barədə razılığa gəliblər.
Müzakirə olunan məsələlər arasında Suriyada qaçqınların və məcburi köçkünlərin öz evlərinə qayıtmasının təmin edilməsi yollarının tapılması da olub. Nazirlər, həmçinin Suriyanın təhlükəsizliyinin artırılmasının, terrorizm, narkotik qaçaqmalçılığı ilə mübarizə üçün tədbirlər görülməsinin vacibliyini vurğulayıblar. Onlar bildiriblər ki, Suriyada milli barışıq hazırda həyata keçirilən bütün səylərin əsas nəticəsi olaraq qalır. Mekdad Səudiyyə Ərəbistanına Suriyadakı böhranın həllində göstərdiyi köməyə və son zəlzələdən sonra onun ölkəsinə göndərilən yardıma görə təşəkkür edib.
Səudiyyə Ərəbistanı bu ilin fevralında Suriyanın şimalında və Türkiyənin cənubunda həyata keçirdiyi yardım səyləri çərçivəsində 1000 çadır, 13329 geyim əşyası, 3600 ədyal və 3600 döşək də daxil olmaqla 85 tondan çox yardım daşıyan 16 təyyarə göndərib.
Bölmənin digər xəbərləri
