Sığortaçılar Assosiasiyası 2023-cü ildən tədris planının hazırlığına başlayacaq
Bakı, 24 dekabr, AZƏRTAC
Yerli sığorta bazarında fəaliyyət göstərən peşəkar sığorta mütəxəssisləri pedaqoji fəaliyyətə cəlb ediləcəklər. Artıq Azərbaycan Sığortaçılar Assosiasiyası (ASA) 2023-cü ildən tədris planının hazırlığına başlamağı nəzərdə tutur.
Bu barədə AZƏRTAC-a Azərbaycan Sığortaçılar Assosiasiyasının icraçı direktoru Elmar Mirsalayev deyib.
Qeyd edilib ki, 2022-ci il ərzində sektorun dayanıqlı inkişafı məqsədilə Azərbaycan Mərkəzi Bankı, Azərbaycan Sığortaçılar Assosiasiyası və İcbari Sığorta Bürosu bir sıra məqsədyönlü tədbirlər həyata keçirib: “Belə ki, bu istiqamətdə mən həm sektorun inkişafına maneə yaradan halların aradan qaldırılması ilə bağlı qanunvericiliyə dəyişiklik layihələrinin hazırlanmasını, eyni zamanda, konkret sığorta növlərinin inkişafı üçün həyata keçirilən mütərəqqi tədbirləri vurğulaya bilərəm. İl ərzində ASA olaraq sektorda kadr potensialının formalaşdırılması və təlim-tədris prosesinin təşkili məqsədilə aparıcı ali təhsil ocaqları olan Azərbaycan Dövlət İqtisad Universiteti və Azərbaycan Dövlət Neft və Sənaye Universiteti ilə qarşılıqlı əməkdaşlıqlar qurduq. Azərbaycan Dövlət İqtisad Universiteti ilə qurduğumuz əməkdaşlığa görə, ölkədə ali təhsil səviyyəsində sığorta ilə bağlı sistemli təhsilin bərpasına nail ola biləcəyik. Belə ki, ilk növbədə, Universitetin tərkibində fəaliyyət göstərən Beynəlxalq Magistratura və Doktorantura Mərkəzində mövcud olan, lakin fəaliyyət göstərməyən sığorta bölməsinin fəaliyyətini Universitetlə birgə təşkil edəcəyik”.
Bölmənin digər xəbərləri
