Şimal regionunda 2900-ə yaxın şagird buraxılış imtahanı verib
Quba, 10 mart, Elxan Yusifli, AZƏRTAC
Martın 10-da Dövlət İmtahan Mərkəzi (DİM) tərəfindən təşkil olunan buraxılış imtahanlarında Quba, Qusar və Xızı rayonlarından 2824 nəfər iştirak edib.
DİM-in Xaçmaz regional bölməsindən AZƏRTAC-ın bölgə müxbirinə bildirib ki, Quba şəhərində 8, Qusarda 4 və Xızıda 1 mərkəzdə keçirilən imtahanlara 285 nəzarətçi müəllim, eləcə də 41 imtahan rəhbəri cəlb olunub.
Buraxılış imtahanları saat 11:00-da başlanıb və 3 saat davam edib. Kütləviliyin və təmas hallarının qarşısının alınması məqsədilə imtahan iştirakçıları üçün imtahan binasına müxtəlif daxilolma vaxtları müəyyən edilib.
İmtahan başa çatdıqdan sonra iştirakçılara sual kitabçalarını özləri ilə aparmağa icazə verilib.
İmtahanlarda istifadə olunan yazılı cavab tələb edən açıq tipli tapşırıqların yoxlanılması vaxt tələb etdiyindən nəticələrin yaxın 4 həftə ərzində elan olunması nəzərdə tutulur.
Bölmənin digər xəbərləri
