Şirvan şəhərində 20 Yanvar şəhidlərinin xatirəsini anma mərasimi keçirilmişdir
Şirvan, 20 yanvar (AZƏRTAC). Yanvarın 20-də Şirvan şəhərində qanlı 20 Yanvar faciəsinin 22-ci ildönümünə həsr olunmuş anma mərasimi keçirilmişdir.
AZƏRTAC xəbər verir ki, şəhərin rəhbər işçiləri, yaşlı nəslin, gənclərin və ictimaiyyətin nümayəndələri “Şəhidlər” abidə kompleksinin önünə əklillər və gül dəstələri düzərək Azərbaycanın suverenliyi və ərazi bütövlüyü uğrunda mübarizədə canlarından keçmiş qəhrəman Vətən övladlarının xatirəsini ehtiramla yad etmişlər. Burada şəhidlərin ruhuna dualar oxunmuşdur.
Tədbir iştirakçıları Qarabağ müharibəsində itkin düşmüş 26 nəfər şirvanlının xatirəsini əbədiləşdirmək məqsədi ilə ucaldılan abidəni də ziyarət etmişlər.
Mərasim 20 Yanvar şəhidlərinin abidə kompleksi qarşısında davam etmişdir.
Anma mərasimində çıxış edən Şirvan Şəhər İcra Hakimiyyəti başçısının müavini Elman Abbasov 22 il əvvəl sovet ordusunun Bakıda törətdiyi qanlı cinayətləri yada salmış, 20 Yanvar faciəsinə hüquqi və siyasi qiymətin verilməsində ümummilli lider Heydər Əliyevin xidmətlərini yüksək qiymətləndirmişdir.
Rayon məktəblilərinin ifasında 20 Yanvar faciəsini əks etdirən ədəbi-bədii kompozisiya nümayiş etdirilmişdir.
Elə həmin gün 20 Yanvar şəhidi Elçin İmanovun adını daşıyan Şirvan şəhər 10 nömrəli orta məktəbin müəllim və şagird kollektivi şəhidin Salyan şəhər qəbiristanlığındakı məzarını ziyarət etmişlər.
Bölmənin digər xəbərləri
