SON BEŞ İLDƏ AZƏRBAYCANDA SOSİAL-İQTİSADİ,SƏHİYYƏ, TƏHSİL VƏ DİGƏR SAHƏLƏRDƏ BÖYÜK İRƏLİLƏYİŞLƏR OLMUŞDUR
AZƏRTAC xəbər verir ki, bu fikir sentyabrın 26-da Milli Məclis sədrinin müavini Valeh Ələsgərovun Azərbaycan qadınlarının III qurultayına dəvət edilmiş Rusiya Federal Məclisi Federasiya Şurasının sədr müavini Svetlana Orlovanın başçılıq etdiyi nümayəndə heyəti ilə görüşündə səslənmişdir.
Görüşdə V.Ələsgərov son illər Azərbaycan və Rusiya arasında hərtərəfli əlaqələrin möhkəmliyini diqqətə çatdırmış, dövlət başçıları səviyyəsində keçirilən görüşlərin münasibətlərin inkişafında mühüm rol oynadığını vurğulamışdır. O, ölkələrimizin ali qanunverici orqanları arasında əməkdaşlığın genişləndirilməsi istiqamətində qarşılıqlı səfərlərin, görüşlərin vacibliyini də qeyd etmişdir.
Səmimi qəbul üçün təşəkkürünü bildirən Rusiya Federal Məclisi Federasiya Şurasının sədr müavini Svetlana Orlova, ölkələrimiz arasında konstruktiv əlaqələrin səviyyəsindən məmnunluğunu qeyd etmişdir. Qarşıdan gələn prezident seçkilərinin Azərbaycanın siyasi həyatında mühüm hadisə olacaqını söyləyən S.Orlova son beş ildə ölkədə sosial-iqtisadi, səhiyyə, təhsil və digər sahələrdə böyük irəliləyişlərin olduğunu vurğulamışdır. O, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın Azərbaycan qadınlarının III qurultayındakı çıxışında səslənmiş bəzi fikirləri diqqətə çatdıraraq demişdir ki, qadınlar Azərbaycan cəmiyyətində özlərinə layiq yer tutur, ölkədə gedən mühüm proseslərdə yaxından iştirak edirlər.
Görüşdə Rusiyanın Azərbaycandakı səfiri Vasili İstratov iştirak etmişdir.
Bölmənin digər xəbərləri
