Sona Quliyeva: İncəsənət inklüziv cəmiyyətin formalaşmasında mühüm rol oynayır
Bakı, 6 noyabr, Anara Axundova, AZƏRTAC
İnklüziv cəmiyyət mövzusu ölkəmizdə getdikcə daha çox aktuallaşır. “Arts Council Azerbaijan”ın sədr müavini, sərgilərin və incəsənət layihələrinin kuratoru Sona Quliyeva AZƏRTAC-a verdiyi müsahibədə xüsusi inkişaf özəlliyi olan insanların mədəni tədbirlərə cəlb edilməsinin vacibliyindən danışıb.
“Xüsusi inkişaf özəlliyi olan insanların incəsənət və mədəni tədbirlərə cəlb edilməsi son dərəcə vacibdir, çünki bu, onların sosial inteqrasiyasını təşviq edir, yaradıcı potensiallarını açır və özünəinamlarını artırır. Buna misal olaraq, Avropa Yaradıcı Sənətkarlıq Günləri çərçivəsində “Arts Council Azerbaijan” tərəfindən təşkil edilən xeyriyyə sərgisində xüsusi inkişaf özəlliyi olan uşaqların iştirakını göstərmək olar. Bu cür təşəbbüslər onların özlərini cəmiyyətin bir hissəsi kimi hiss etmələrinə və istedadlarını digər iştirakçılarla bərabər səviyyədə nümayiş etdirmələrinə imkan verir”, - deyə o qeyd edib.
Onun müşahidələrinə görə, incəsənət güclü terapevtik təsirə malikdir və emosiyaların ifadə olunmasına yardımçı olur, ünsiyyət və idrak bacarıqlarını inkişaf etdirir, özünüifadə və sosial adaptasiyanı təşviq edir.
“Bu kateqoriyadan olan insanların iştirakı təkcə öz qabiliyyətlərini nümayiş etdirmək üçün bir fürsət deyil, həm də şəxsi inkişaf və ilham vasitəsinə çevrilir. Xüsusi inkişaf özəlliyi olan şəxslər yaradıcılıq vasitəsilə ətrafdakı dünya ilə qarşılıqlı əlaqədə olmağı və orada öz yerlərini tapmağı öyrənirlər.
İncəsənət inklüziv cəmiyyətin qurulmasında da mühüm rol oynayır. O, müxtəlif qabiliyyət və baxışlara malik insanları birləşdirir, stereotipləri dağıdır və müxtəlifliyə hörməti artırır. Xeyriyyə yarmarkası, sərgi və ya konsert kimi layihələr yaradıcılığın insanlar arasında körpüyə çevrilə biləcəyini, anlaşmanı, rəğbəti və qarşılıqlı dəstəyi təşviq edə biləcəyini nümayiş etdirir. Bu cür təşəbbüslər sayəsində cəmiyyət xüsusi inkişaf özəlliyi olan insanlara daha açıq və rəğbətlə yanaşır”, - deyə Sona Quliyeva vurğulayıb.
“Arts Council Azerbaijan”ın sədr müavini hesab edir ki, incəsənət uşaqlarda incə hərəkətverici bacarıqların inkişaf etdirilməsindən və estetik zövq aşılanmasından tutmuş terapiyada və hətta diplomatiyada istifadəsinə qədər həyat fəaliyyətinin bir çox sahəsini inkişaf etdirmək üçün bir vasitədir.
Bölmənin digər xəbərləri
