Sözlə əməl bir olanda
İdmançılarımızın qələbələri barədə düşüncələr və bəzi mülahizələr
Bakı, 4 aprel (AZƏRTAC). Almaniyanın Dortmund şəhərində ötən bazar başa çatmış Avropa çempionatının son günündə Azərbaycan güləşçilərinin mübarizəsini televizorla izləyəndə belə bir qənaətə gəldim ki, idmançılarımızın qələbələri artıq adi hala çevrilmişdir. Bu adilik məndə ölkəmizə, dövlət himnimizə, üçrəngli bayrağımıza, dövlət başçımıza, idman federasiyalarımıza, idmançılarımıza, azarkeşlərimizə, gənclərimizə görə böyük qürur hissi doğurdu.
Adətən, hansı bir hadisəni qiymətləndirərkən müqayisə üsuluna üstünlük verirlər. Mən də düşündüm ki, 15 il əvvəl biz dünya idmanında necə tanınırdıq? Çoxlarının tanımadığı, dövlət himnimizin yalnız rəsmi tədbirlərdə səsləndirildiyi, dövlət bayrağımızın beynəlxalq yarışlarda yüksəyə qaldırılmadığı və hətta xarici ölkələrdə keçirilən idman yarışlarının tribunalarında nadir hallarda göründüyü ölkə idik.
Azərbaycan Milli Olimpiya Komitəsinin prezidenti İlham Əliyev 10 il bundan əvvəl idmançılarla görüşü zamanı idman ictimaiyyəti qarşısında dəqiq vəzifələr qoyaraq demişdi ki, harada iş düzgün qurulursa, orada qələbə əldə olunur. Bu formul əvvəllər olduğu kimi, Dortmundda keçirilmiş Avropa çempionatında da öz nəticəsini verdi. Bu formula riayət edən Azərbaycan təmsilçiləri ötən idman ilində beynəlxalq yarışlarda ölkəmizin bayrağını 674 dəfə yüksəltmişlər, özü də bayrağımız 225 dəfə Azərbaycanın dövlət himninin sədaları altında ucaldılmışdır.
Bu gün artıq xarici ölkələrdə keçirilmiş yarışlarda Azərbaycan azarkeşlərinin tribunaları doldurması adi hala çevrilmişdir. İdmançılarımızın dünyanın aparıcı istehsalçılarının ən yaxşı idman formalarını geyməsinin özü də artıq adi haldır. Dünyanın məşhur brendləri ilə yanaşı, idman yarışlarının keçirildiyi zallarda ARDNŞ, “ATAholdinq”, “Azərsell” və başqa Azərbaycan şirkətlərinin reklamlarının görünməsi də adi hal kimi qarşılanır. Qadınlar arasında voleybol üzrə Avropanın iki mötəbər yarışının finalında Azərbaycanı eyni vaxtda üç komandanın təmsil etməsinə artıq dünyada heç kim təəccüblənmir. Azərbaycan təmsilçilərinin dünya çempionatlarının, Avropa birinciliklərinin, Olimpiya oyunlarının qaliblərinin mükafatlandırılmasında iştirak etməsi də adi hal almışdır. Biz xarici ölkələrdə keçirilən yarışlara idman jurnalistlərinin komanda ilə birlikdə səfər etməsi faktına da artıq öyrəşmişik. Bir neçə ildir ki, Azərbaycan vətəndaşları Olimpiadalardan, dünya və Avropa çempionatlarından reportajları milli televiziya kanallarında öz dilimizdə izləyə bilirlər. İdmançılarımızın xarici ölkələrdə keçirilən yarışlara milli aviasiya şirkətinin təyyarələri ilə getmələrini, ən yaxşı mehmanxanalarda qalmalarını artıq adi hal hesab edirik. Yarışlardan qələbə ilə dönən idmançılarımızı Bakı hava limanında çoxsaylı azarkeşlər qarşılayırlar.
Lakin özlərini müxalifətçi adlandıran bəzi şəxslər bu dediklərimizə qısqanırlar. Qoy onlar Azərbaycan Respublikasının Prezidenti İlham Əliyevin üçrəngli bayrağımızın ucaldığı Bayraq meydanının açılışı zamanı söylədiyi parlaq nitqi xatırlasınlar. Qoy onlar ölkəmizin baş vətənpərvərinin şəhid, Azərbaycanın Milli Qəhrəmanı Mübariz İbrahimovla vida mərasimində dediyi sözləri yada salsınlar.
Ötən ilin yayında Azərbaycandan on dəfə çox neft çıxaran ölkənin nümayəndəsi Bakıda qonaq idi. Şəhəri gəzərək parklarla, xiyabanlarla tanış olan qonaq paytaxtımızın gözəlliyinə heyranlığını belə ifadə etmişdi: “Rəhbərliyinizin sizin üçün gördüyü işlərin heç 10 faizi bizim ölkənin vətəndaşları üçün görülməmişdir”. Bu sözlər heç bir tribunadan çıxış etməyən və öz ölkəsini çox sevən bir adamın dilindən çıxmışdır.
Azərbaycan xalqının ümummilli lideri Heydər Əliyev ölkənin dünya miqyasında geniş təbliğində idmanın rolunu həmişə xüsusi vurğulamışdır. Bu siyasəti Azərbaycan Respublikasının Prezidenti, ölkənin Milli Olimpiya Komitəsinin rəhbəri İlham Əliyev uğurla həyata keçirir.
Söhbətimə güləşdən başladım və fikrimi bu idman növü ilə də bitirmək istəyirəm. Son dörd ildə Azərbaycanda güləş həqiqətən milli idman növünə çevrilmişdir. Pəhləvanlarımızın uğurları ildən-ilə artır. 2007-ci ildən bəri güləşçilərimizin təkcə Avropa çempionatlarında qazandıqları medalların sayında müşahidə edilən artım (2007-ci ildə 2, 2008-ci ildə 7, 2009-cu ildə 9, 2010-cu ildə 10, 2011-ci ildə 14 medal) gələcəyə böyük ümidlər yaradır.
İndi Azərbaycan idmançıları bütün mötəbər yarışlarda iştirak etməklə yanaşı, sübut edirlər ki, onlar həmin yarışların həm də favoritləridir. Nüfuzlu mütəxəssislərin, tanınmış idman şərhçilərinin rəyləri də buna sübutdur. Bir çox ölkənin güləşçiləri məşq toplanışları üçün indi məhz bizim ölkəni seçirlər.
Vaxt vardı, biz qələbələr üçün darıxmışdıq. Sağ olsun idmançılarımız ki, artıq 15 ildir bizə qələbə sevinci bəxş edirlər. Ölkəmizin vətəndaşları əmindirlər ki, Azərbaycanın Ali Baş Komandanının rəhbərliyi altında əsas qələbəmizi bayram edəcəyimiz gün çox da uzaqda deyildir.
Ziyadxan Həsənov
AZƏRTAC-ın müxbiri
Bölmənin digər xəbərləri
