Stolüstü tennis üzrə Azərbaycan birinciliyinin qalibləri müəyyənləşib
Bakı, 16 aprel, AZƏRTAC
Stolüstü tennis üzrə Azərbaycan birinciliyinin qalibləri müəyyənləşib.
AZƏRTAC xəbər verir ki, “Şüa” İdman - Sağlamlıq Kompleksində keçirilən yarışın son günündə final görüşləri olub. Gərgin və maraqlı mübarizə ilə yadda qalan birinciliyin nəticələrinə əsasən, 2004-2006-cı il təvəllüdlü qızların şəxsi turnirində Ləman Abdulhəmidova qalib gəlib. Zemfira Mikayılova ikinci, Xədicə Əbilzadə ilə Səbinə Məmmədova üçüncü yerləri tutublar. Oğlanlar arasında baş mükafata Emin Məmmədov layiq görülüb. Kənan Pənahov gümüş, Murad Cəfərovla Hacımurad Məmmədbəyov bürünc medal qazanıblar.
Qızların qoşa yarışlarında Zemfira Mikayılova ilə Xədicə Əbilzadə, oğlanlarda isə Kənan Pənahovla Emin Məmmədov Azərbaycan çempionu olublar. Qarışıq-qoşa yarışlarda Ləman Abdulhəmidova ilə Kənan Pənahov bütün rəqiblərinə qalib gəlib.
Xatırladaq ki, 2004-2006-cı il təvəllüdlü qızların komanda turnirində “Bakı” komandası birinci, “Şəki” komandası ikinci yeri tutub. “Sumqayıt” və “Şabran” komandaları üçüncü yeri bölüşüblər. Oğlanların mübarizəsindən də “Bakı” komandası qalib ayrılıb. “Sumqayıt” ikinci, “Salyan” və “Şəki” tennisçiləri üçüncü yerlərə sahib olublar.
Mərziyyə Nürmətova 2007-ci il təvəllüdlü və daha azyaşlı tennisçilərin şəxsi mübarizəsindən qalib ayrılıb. Aylin Əsgərova gümüş, Arzu Aslanova ilə Yağmur Məmmədli bürünc medal əldə ediblər. Oğlanların yarışı Adil Əhmədzadənin qələbəsi ilə yekunlaşıb. Onur Quluzadə ikinci, Toğrul Məhəmmədovla Hüseyn Elyazov üçüncü yeri tutublar. Qızların qoşa yarışlarında Mərziyyə Nürmətova ilə Arzu Aslanova, oğlanların mübarizəsində isə Adil Əhmədzadə ilə Rüstəm Hacılı qalib gəliblər. Qarışıq-qoşa turnirdə Onur Quluzadə - Nigar Mahmudova tandemi çempion adına layiq görülüb. Qızların komanda yarışı “Sumqayıt - 1” kollektivinin qələbəsi ilə yekunlaşıb. “Sumqayıt -2” komandası ikinci yerdə qərarlaşıb. “Sumqayıt - 3” və “Şabran” fəxri kürsünün üçüncü pilləsində yer alıb.
Oğlanların turniri isə “Bakı-1” komandasının qələbəsi ilə başa çatıb. “Sumqayıt -1” ikinci yerlə kifayətlənib. “Bakı-2” və “Şabran” komandaları üçüncü pillədə qərarlaşıblar.
Qeyd edək ki, Azərbaycan Stolüstü Tennis Federasiyasının və Gənclər və İdman Nazirliyinin birgə təşkil etdiyi və kütləviliyi ilə seçilən budəfəki birinciliyə paytaxt tennisçiləri ilə yanaşı, Gəncə, Sumqayıt, Quba, Qusar, Şabran, Salyan, Şirvan, Şəki, Qax, Balakən, Ağstafa, Gədəbəy, Zərdab və Samuxdan, ümumilikdə 150-yə yaxın idmançı qatılıb.
Yarışda fərqlənən idmançılara Azərbaycan Stolüstü Tennis Federasiyasının mükafatları təqdim olunub. Fəxri kürsüyə yüksələn stolüstü tennisçilər seçmə komandaların heyətinə cəlb olunaraq beynəlxalq yarışlarda ölkəmizi təmsil etmək imkanı qazanacaqlar.
Bölmənin digər xəbərləri
