Strasburqda Xocalı faciəsinin 20 illiyi ilə bağlı izdihamlı mitinq keçiriləcəkdir
Paris, 19 fevral (AZƏRTAC). Fevralın 25-də Strasburqun mərkəzi Kleber meydanında Xocalı faciəsinin 20 illiyi ilə bağlı “Xocalıya ədalət” devizi altında izdihamlı mitinq keçiriləcəkdir.
Aksiya Strasburqda fəaliyyət göstərən “Azərbaycan evi”nin təşkilatçılığı, Azərbaycan Mədəni Əlaqələr və Azərbaycan Kültür cəmiyyətlərinin, Fransadakı Azərbaycanlı Tələbələr Assosiasiyasının, Azərbaycanlılar və digər Türkdilli Xalqların Əməkdaşlıq Mərkəzinin (ATXƏM) dəstəyi ilə reallaşdırılacaqdır.
Kleber meydanında Xocalı faciəsinin dəhşətlərindən bəhs edən, fransız və ingilis dillərində çap olunmuş kitab və broşürlərdən, habelə fotolardan ibarət sərgi açılacaq, yerli sakinlərə, qonaqlara ermənilərin Azərbaycan xalqına qarşı dəfələrlə törətdikləri soyqırımının bariz nümunəsi kimi Xocalı hadisələrindən bəhs edən vərəqlər paylanacaq, müdhiş gecədə həlak olan 613 xocalının xatirəsinə havaya al rəngli 613 şar buraxılacaqdır.
Qardaş türk diaspor təşkilatları nümayəndələrinin də iştirak edəcəyi mitinqdə Azərbaycan nümayəndə heyətinin üzvləri və digərləri Xocalı faciəsi ilə bağlı çıxış edəcəklər.
Əsgər Əliyev
AZƏRTAC-ın xüsusi müxbiri
Paris
Bölmənin digər xəbərləri
