SUMQAYIT MƏKTƏBİNİN MƏZUNU AZƏRBAYCANDA TEST İMTAHANLARI TARİXİNDƏ ƏN YÜKSƏK BAL TOPLAMIŞDIR
120 sualdan yalnız birini cavabsız qoyan Elvin rekord sayda bal toplamışdır. Bu, həm onun imtahan verdiyi ikinci qrupda, həm də ümumiyyətlə, bütün respublika üzrə ən yüksək göstəricidir. Tələbə Qəbulu üzrə Dövlət Komissiyasının sədri Məleykə Abbaszadə “Space” telekanalı ilə çıxışında bildirmişdir ki, Elvin İsmayılovun nailiyyəti Azərbaycanda test imtahanları tarixində ən yüksək göstəricidir.
İndi Elvin Sumqayıtda çox məşhurdur. Sadə sumqayıtlı ailə mənzilində müxtəlif telekanalların çəkiliş qruplarını, jurnalistləri, qohum-qonşuları qonaqpərvərliklə qarşılayır. Uşaqlıqdan hər şeyi öyrənmək istəyi, intizamlılığı, biliklərə yiyələnmək arzusu ilə fərqlənən gənc saysız-hesabsız təbrikləri qəbul edir.
Elvinin valideynləri və bacısı da onun sevincinə şərikdirlər. Onun 1992-ci ildə Zəngilan rayonundan köçüb Sumqayıtda məskunlaşmış ata-anası iki övladını alın təri ilə böyüdürlər. İndi Elvinin Prezident təqaüdü ailənin maddi vəziyyətini xeyli yaxşılaşdıracaqdır.
Elvin yaxşı təhsil almaq, Azərbaycan iqtisadiyyatının inkişafına və tərəqqisinə layiqli töhfəsini vermək arzusundadır.
Bölmənin digər xəbərləri
