SUMQAYIT MƏKTƏBLƏRİ YENİ TƏDRİS İLİNƏ HAZIRDIR
Sumqayıt məktəblərinin maddi-texniki bazasının möhkəmləndirilməsi məsələsi son 3 ildə daha aktual olmuşdur. İcra hakimiyyətinin təşəbbüsü ilə 30 məktəbin dam örtüyü dəyişdirilmiş, 20 məktəb binasının zirzəmisi qurudulmuş, subasmanın qarşısını almaq üçün nasoslar quraşdırılmış, 27 təhsil ocağında mini-qazanxanalar bərpa edilmiş, yeniləri tikilmişdir. Bu proses davam edir.
Yay tətilində də az iş görülməmişdir. Bu işə cəlb olunan bütün qurumların dəqiq və nizamlı qarşılıqlı fəaliyyəti sayəsində Sumqayıt məktəbləri yeni tədris ilinə tam hazır vəziyyətə gətirilmişdir.
V.Bağırovun sözlərinə görə, Bilik günü 13 nömrəli məktəbin kollektivi üçün əsil bayrama çevriləcəkdir. Bu təhsil ocağı yaradıldığı gündən bəri təmir edilməmişdi. Şəhər rəhbərliyinin köməyi ilə binada təmir işləri aparılmışdır. Tamamilə yenidən qurulmuş məktəb şagirdləri gözləyir.
Qarşıdan gələn tədris ilində yeni məktəbin istifadəyə veriləcəyi isə təhsil işçilərinin xüsusi sevincinə səbəb olmuşdur. Bu təhsil ocağı şəhərin 21-ci mikrorayonunda inşa edilir.
Üç il əvvəl icra hakimiyyətinin təşəbbüsü ilə bir neçə məktəbdə uşaqlar üçün yay istirahət düşərgələrinin fəaliyyəti bərpa olunmuşdu. Bu il də həmin təcrübə uğurla davam etdirilmişdir. Şəhər rəhbərliyinin köməyi və maliyyə dəstəyi sayəsində Sumqayıtın bütün məktəblərində belə düşərgələr fəaliyyət göstərmişdir.
Tezliklə ilk zəng təzə dərs ilinin başlandığından xəbər verəcək, on minlərlə Sumqayıt məktəblisi maraqlı yay tətilindən sonra yenidən doğma məktəblərində biliklərə yiyələnəcəklər.
