Sumqayıt şəhər Heydər Əliyev Mərkəzində “Qarabağa dönüş” sərgisi açılıb
Sumqayıt, 11 mart, Ətrabə Rzayeva, AZƏRTAC
Sumqayıt şəhər Heydər Əliyev Mərkəzində “Qarabağa dönüş” adlı sərgi açılıb. Sərgidə Xidmət Sahələri üzrə Sumqayıt Dövlət Peşə Təhsil Mərkəzinin tələbələrinin əl işləri təqdim olunur. Tədbir Prezidentin Sərəncamına əsasən Azərbaycanda 2022-ci ilin “Şuşa İli” elan edilməsi çərçivəsində keçirilib.
AZƏRTAC xəbər verir ki, şəhərin bir sıra idarə, müəssisə və təşkilatlarının rəhbərlərinin, ictimaiyyət nümayəndələrinin də iştirak etdiyi sərginin açılışında Sumqayıt Şəhər İcra Hakimiyyəti başçısının birinci müavini Teymur Səmədov, Sumqayıt şəhər Gənclər və İdman Baş İdarəsinin rəisi Elgün Hümbətov, Sumqayıt Regional Mədəniyyət İdarəsinin rəisi Rəşad Əliyev, Milli Məclisin deputatı Emin Hacıyev, Heydər Əliyev Mərkəzinin direktoru Vüsalə Qurbanova, Xidmət Sahələri üzrə Sumqayıt Dövlət Peşə Təhsil Mərkəzinin direktoru Gülşən Ömərova çıxış edərək bu səpkili layihələrin təşkil edilməsinin tariximizin, milli-mənəvi dəyərlərimizin qorunub saxlanması istiqamətində təqdirəlayiq hal olması, 44 günlük Vətən müharibəsi, qazanılan şanlı Qələbə, Azərbaycanın mədəniyyət paytaxtı elan edilən Şuşada şəhərin əsl tarixi simasının bərpası yönündə nəhəng layihələrin gerçəkləşdirilməsi haqqında fikirlər söyləyiblər.
Sonra iştirakçılar sərgi ilə yaxından tanış olublar. Tələbələrin yaratdığı Qarabağ xanlıqlarının sonuncu vərəsəsi Xurşidbanu Natəvan və Qarabağ xanı İbrahimxəlil xan Cavanşirin baş vəziri Molla Pənah Vaqif obrazları iştirakçıları salamlayıb.
“Dərzi” ixtisası üzrə təhsil alan tələbələrin yaratdığı 18 ədəd Qarabağ milli geyimləri böyük maraqla izlənib. Xüsusi incəliklə hazırlanan müxtəlif əl işləri, aksesuarlar zövq oxşayıb.
Rəssam-tələbələrin yaratdığı əsərlərdə Qarabağın tarixi, məişəti, onun qəhrəman Ordumuzun şücaəti nəticəsində işğaldan azadlığa qovuşması əks olunub.
İşğaldan azad olunan Qarabağ torpağının mətbəxi Azərbaycanın ənənəvi milli mətbəx mədəniyyətinin tərkib hissəsidir. “Aşpaz” ixtisası üzrə təhsil alan tələbələrin Qarabağın zəngin mətbəxinə dair 36 növ xörək və şirniyyatı, quru meyvə və çərəzlərdən ibarət milli atributlar sərgidə nümayiş etdirilib. Qonaqların tələbələrin hazırladığı ləziz taamlardan dadmaq imkanı da olub.
Sərgidə, eyni zamanda, kompüter operatoru, bərbər, vizajist və digər ixtisaslar üzrə təhsil alan tələbələrin xüsusi guşələrdə təqdim etdiyi əl işləri nümayiş etdirilib.
Tələbələrin ifa etdiyi milli rəqslər, musiqiçilərin çıxışı həvəslə izlənib, alqışlarla qarşılanıb.
Sərgi peşə təhsilli gənclərin karyera perspektivinin, məşğulluğunun təminatçısı kimi, onların ixtisası üzrə əmək bazarında iş tapmasında vacib amil olduğunu bir daha təsdiqləyir. Sərginin də məqsədi gənclərin peşə seçimində yeni üfüqləri göstərmək, onlara dəstək olmaqdır.
Bölmənin digər xəbərləri
