“Taliban” hərəkatı Əfqanıstanın 174 rayonuna nəzarət etdiyini bildirib
Bakı, 9 iyul, AZƏRTAC
“Taliban” hərəkatı Əfqanıstanın 174 rayonunda nəzarəti ələ keçirdiyini bildirib.
AZƏRTAC TASS informasiya agentliyinə istinadla xəbər verir ki, bu barədə “Taliban” hərəkatının Moskvada səfərdə olan nümayəndə heyətinin rəhbəri Şahabuddin Delavar məlumat verib.
“Hazırda Əfqanıstanın 174 rayonu faktiki olaraq İslam Əmirliyinin nəzarəti altındadır. Vurğulamaq istəyirik ki, bu uğurlar tək silah gücü ilə izah oluna bilməz. Xalq Əfqanıstan İslam Əmirliyindən razıdır və onu alqışlayır”, - deyə o bildirib.
Əfqanıstan ərazisinin 85 faizinin “Taliban” hərəkatının idarəsi altına keçdiyini deyən Şahabuddin Delavar beynəlxalq təşkilatları həmin ərazilərdə işlərini davam etdirməyə çağırıb.
Onun sözlərinə görə, Kabil ABŞ əsgərlərinin geri çəkilməsi fonunda “Taliban” hərəkatına əməkdaşlıq təklifləri ilə müraciət edir. Dohada aparılan danışıqlar müsbət nəticə verərsə, hücumlar dayandırılacaq.
“Hərəkat hakimiyyəti tam qəsb etməyi hədəfləmir və cəmiyyətin bütün nümayəndələrinin Əfqanıstan dövlətində təmsil olunmasının vacibliyinə inanır”, - deyə “Taliban”ın nümayəndəsi əlavə edib.
Taliblər hərbi əməliyyatlarla paralel olaraq, çoxillik münaqişənin sülh yolu ilə həlli üçün Kabillə danışıqları davam etdirir. Müşahidəçilərin fikrincə, Əfqanıstanda xarici qoşunların qalmayacağı təqdirdə “Taliban” hakimiyyətə ya siyasi proseslərin nəticələrinə əsasən, ya da hərbi yolla gələcək.
Bölmənin digər xəbərləri
