Tallində koronavirusun yayılması təhlükəsi səbəbi ilə nəzarət gücləndirilir
Tallinn, 2 mart, AZƏRTAC
Estoniyanın paytaxtı Tallində koronavirus şübhəsi ilə təcili tibbi yardıma edilən çağırışlara üç nəfərlik təcili yardım qrupuna əlavə olaraq bir tibb işçisindən və sanitardan ibarət xidmət qrupu da qoşulacaq.
AZƏRTAC xəbər verir ki, iki nəfərdən ibarət heyət hər gün saat 10:00-dan 18:00-dək xidmət göstərəcək, qalan vaxt isə təcili tibbi yardım üç nəfərdən ibarət adi heyətlə çalışacaq.
Hava limanı və dəniz limanı kimi ictimai yerlərə üçnəfərlik heyət bütün sutka ərzində növbə çəkəcək. Koronavirusa yoluxma şübhəsi olan insanlar xəstəxanalara yerləşdiriləcək.
Təcili yardım qrupları siqnal mərkəzinə daxil olan məlumatlar əsasında çağırışlara gedəcəklər.
Nümunələr üzrə analizlər ölkənin Səhiyyə Departamentinin laboratoriyasına aparılacaq.
Analizlərin nəticələri barədə xəstəxananın baş növbətçisinə məruzə olunacaq.
Asiman Əsədov
AZƏRTAC-ın xüsusi müxbiri
Tallinn
Bölmənin digər xəbərləri
