Tatyana Poloskova: ŞƏT sammitində Azərbaycanın iştirakı onun dünyada artan rolunu göstərir
Bakı, 1 sentyabr, AZƏRTAC
Şanxay Əməkdaşlıq Təşkilatının (ŞƏT) sammitində Azərbaycanın fəal iştirakı və Prezident İlham Əliyevin keçirdiyi çoxsaylı görüşlər Azərbaycanın regionda və daha geniş beynəlxalq müstəvidə artan siyasi çəkisinin göstəricisidir. Sammit çərçivəsində Azərbaycan nümayəndə heyətinə göstərilən yüksək diqqət ölkənin geosiyasi mövqeyi, həyata keçirdiyi balanslaşdırılmış xarici siyasət və beynəlxalq əməkdaşlığın inkişafına verdiyi töhfələrin nəticəsi kimi qiymətləndirilə bilər.
Bu fikirləri AZƏRTAC-a açıqlamasında Rusiyanın birinci dərəcəli dövlət müşaviri Tatyana Poloskova deyib.
Ekspert ŞƏT sammitində baş verən prosesləri Azərbaycan nümayəndə heyətinin, xüsusilə Prezident İlham Əliyevin diplomatik uğuru kimi dəyərləndirib. “Sammit çərçivəsində Azərbaycan Prezidentinə göstərilən diqqət, keçirilən rəsmi və qeyri-rəsmi görüşlərin, o cümlədən “ayaqüstü” təmasların çoxluğu ölkəmizə beynəlxalq marağın yüksək olduğunu göstərir. ŞƏT sammitində baş verənləri, ümumilikdə Azərbaycan nümayəndə heyətinin və ilk növbədə Prezident İlham Əliyevin diplomatik triumfu adlandırardım. Formal və qeyri-formal danışıqların, görüşlərin və sammit çərçivəsində keçirilən təmasların sayına baxdıqda Azərbaycana marağın nə qədər böyük olduğu aydın görünür. Bu, ilk növbədə, Azərbaycanın geosiyasi mövqeyindən və ölkə rəhbərliyinin ikitərəfli və çoxtərəfli beynəlxalq əməkdaşlığın inkişafına yönəlmiş strategiyasından irəli gəlir. Azərbaycan artıq yalnız regional proseslərin iştirakçısı deyil, qlobal geosiyasi proseslərdə öz mövqeyini formalaşdıran və beynəlxalq gündəliyə təsir imkanlarını genişləndirən ölkəyə çevrilir”, - deyə müşavir vurğulayıb.
T.Poloskova Azərbaycanın təkcə regional deyil, dünya səviyyəsində mühüm oyunçuya çevrildiyini bildirib: “Azərbaycan təşkilatın üzvü olmasa da, tərəfdaş kimi ŞƏT-in inkişafında mühüm yer tutur. Çin rəhbərliyinin Azərbaycanın təşkilat çərçivəsində əhəmiyyətini xüsusi vurğulaması bunun göstəricisidir. Azərbaycanın əhəmiyyətini müəyyən edən əsas amillərdən biri onun strateji logistika mövqeyidir. Azərbaycan Çin və digər Asiya dövlətlərini Türkiyə və Avropa ilə birləşdirən mühüm nəqliyyat-kommunikasiya marşrutlarının üzərində yerləşir. Bu baxımdan Azərbaycanın Orta Dəhlizin inkişafındakı rolu təkcə iqtisadi və nəqliyyat məsələsi deyil, həm də geniş geosiyasi əhəmiyyət daşıyır. Azərbaycanın malik olduğu coğrafi üstünlüklər bir çox ölkələrdə olsa da, həmin imkanlardan səmərəli istifadə etmək əsas məsələdir. Azərbaycan öz coğrafi, iqtisadi və siyasi potensialını ardıcıl dövlət siyasəti ilə real geosiyasi üstünlüklərə çevirə bilib. Bəzən ölkənin böyük dövlətə çevrilməsi üçün bütün imkanları olur, lakin həmin imkanlardan istifadə edilmir. Azərbaycan isə öz imkanlarından maksimum dərəcədə yararlanır. Burada Prezident İlham Əliyevin fəallığını, peşəkarlığını və diplomatik bacarığını, eyni zamanda, Azərbaycan xalqının ölkə rəhbərliyinə dəstəyini xüsusi qeyd etmək lazımdır”.
Ekspert hesab edir ki, Azərbaycanın gələcəkdə Şərq ilə Avropa arasında yalnız bağlantı ölkəsi kimi deyil, dünya siyasətində mühüm aktor kimi çıxış etmək potensialı yüksəkdir. O, bu prosesdə Türk dünyasının inteqrasiyasına xüsusi əhəmiyyət verib və Türk Dövlətləri Təşkilatının perspektivlərini mühüm amil kimi qiymətləndirib: “Azərbaycanın çoxtərəfli və çoxvektorlu xarici siyasəti müxtəlif siyasi və iqtisadi sistemlər arasında əlaqələrin qurulmasına imkan verir. Bu siyasət Azərbaycanın həm Şərqdə, həm Qərbdə, həm də digər geosiyasi məkanlarda nüfuzunun artmasına şərait yaradır, bütövlükdə Cənubi Qafqazda yeni geosiyasi reallığı formalaşdırır. Region ölkələrinin və xalqlarının gələcəkdə öz mövqelərini və maraqlarını daha aydın şəkildə müəyyənləşdirməsi yeni əməkdaşlıq imkanlarının yaranmasına gətirib çıxara bilər. Biz regionda qlobal geosiyasi dəyişikliklərin baş verdiyini görürük. Bu dəyişikliklər, ilk növbədə, regionun öz tarixində və gələcəyində yerini daha aydın dərk etməsi ilə bağlıdır. Azərbaycanın ardıcıl xarici siyasəti, strateji coğrafi mövqeyi, nəqliyyat-logistika imkanları və Türk dünyasında artan rolu ölkənin gələcəkdə regional və qlobal proseslərdə daha fəal iştirak etməsinə geniş imkanlar yaradır. Bu sammiti Azərbaycanın diplomatik triumfu hesab edirəm və ölkənin bundan sonra da böyük uğurlar qazanacağına ümidvaram”.
Müxbir - Səbinə Əlizadə
Bölmənin digər xəbərləri
