Tbilisidə “Keçmişdən gələn oğlan” tamaşasının təqdimatı olub
Tbilisi, 15 dekabr, AZƏRTAC
“Keçmişdən gələn oğlan” yoxsa “Keçmişlə müasirlik arasında”. Qardabanidə fəaliyyət göstərən “Beez” Uşaq Teatrının hazırladığı “Keçmişdən gələn oğlan” tamaşasını “Keçmişlə müasirlik arasında” da adlandırmaq olar.
AZƏRTAC xəbər verir ki, Tbilisidə gənc yazıçı Azər Musaoğlunun eyniadlı pyesi əsasında hazırlanmış “Keçmişdən gələn oğlan” tamaşasının təqdimatı olub.
“Bezz” teatrının balaca aktyorların təqdim etdiyi tamaşada keçmişdən gələn məktəbli oğlanın müasir tay-tuşlarından fərqindən, müasir uşaq və yeniyetmələrin, gənclərin yeni texnologiyalara aludə olaraq kitab oxumaqdan, real həyatdan necə uzlaşdıqlarından bəhs olunur.
Balaca aktyor Akif İslam anasından pul alaraq teatra getmək istəyir. Lakin o, heç özü də bilmədən gələcəyə düşür və burada müasir uşaqların əsas məşğuliyyətini, kitabdan, teatr və tamaşalardan necə uzaq düşdüklərini şahidi olur.
Balaca aktyor məharətlə yaratdığı obrazla deyir ki, yalnız telefon, planşet və kompüter oyunları oynayan, teatra, kinoya getməyən, kitabxanaların yolunu tanımayan gənclik real həyatın qiymətini bilə bilməz.
Müxtəlif rəqs nömrələri ilə müşayiət olunan tamaşada yaşlı nənələrimizin nəsihətləri də əksini tapıb.
Qeyd edək ki, “Keçmişdən gələn oğlan” pyesinin müəllifi Azər Musaoğlu, rejissoru Binəli İslamoğludur. Tamaşanın geyim üzrə rəssamı Mahnur Ənvərdir. Tamaşada əsas rolları İslam Akif, Əli Bayramov, Rabia Əhmədova, Səma Ləzgiyeva, Zəhra Akif, Əzəm Əfəndiyeva, Milana Əliyeva, Məryəm Əliyeva, Gövhər Nəsibova, Mədinə Vəliyeva və Meira Talıbova ifa ediblər.
Sonda “Alyans” Gənclər Mərkəzinin rəhbəri Rəna Hüseynova və mərkəzin əməkdaşları aktyorlara gül və hədiyyələr təqdim ediblər.
Binəli İslamoğlu AZƏRTAC-a müsahibəsində deyib ki, tamaşanı hazırlamaqda məqsəd yeni müasir texnologiyaları və onlardan istifadəni tənqid etmək deyil. Sadəcə olaraq teatrın kollektivi müasir insanlara teatr dili ilə demək istəyir ki, texnologiyadan istifadə edərkən real həyatı, keçmişi unutmaq olmaz.
Rejissor tamaşanın informasiya dəstəyinə görə, AZƏRTAC-a minnətdarlıq edib.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
