Təbrizdə çıxan nüfuzlu “Şəhriyar” qəzeti 20 Yanvar faciəsindən bəhs edən məqalə dərc etmişdir
Təbriz, 20 yanvar (AZƏRTAC). Təbrizdə böyük tirajla nəşr olunan nüfuzlu “Şəhriyar” qəzetində “20 Yanvar - qanlı faciə” sərlövhəli məqalə dərc edilmişdir. Məqalədə 20 Yanvar faciəsinin dəhşətləri barədə farsdilli oxuculara ətraflı məlumat verilmişdir. Qəzet yazır ki, 1990-cı il yanvarın 19-dan 20-nə keçən gecə keçmiş SSRİ rəhbərliyinin Bakıya qoşun yeritməsi ötən əsrin ən ağır hərbi cinayətlərindəndir. Lakin Azərbaycan xalqı hərbi təcavüzə boyun əymədi. Xalq Vətən və torpaq uğrunda canlarını qurban verən qəhrəman övladlarını ləyaqətlə son mənzilə yola saldı. O vaxtdan şəhərin ən hündür yerində salınmış Şəhidlər xiyabanı Azərbaycan xalqının müqəddəs and yerinə çevrilmişdir. Azərbaycan xalqı öz qəhrəman övladlarını heç vaxt unutmur. Milyonlarla insan şəhidlərin uyuduğu məzarları ziyarət etməkdən qürur duyur.
Məqalədə qanlı faciənin birbaşa təşkilatçıları olan Qorbaçov, Yazov, Vəzirov və başqalarının bu cinayətdə birbaşa təqsirkar olduqları barədə də oxuculara məlumat verilmişdir.
Sabir Şahtaxtı
AZƏRTAC-ın xüsusi müxbiri
Təbriz
Bölmənin digər xəbərləri
