“Təmiz Şəhər” ASC-də 20 Yanvar şəhidlərinin xatirəsi anıldı
Bakı, 19 yanvar, AZƏRTAC
“Təmiz Şəhər” ASC-də 20 Yanvar faciəsi ilə bağlı tədbir keçirilib.
ASC-dən AZƏRTAC-a bildiriblər ki, bir dəqiqəlik sükutla faciə qurbanlarının xatirəsi anıldıqdan sonra “Təmiz Şəhər”in idarə heyətinin sədri Zakir İbrahimov çıxış edib. O, 20 Yanvar faciəsi barədə danışaraq müstəqilliyimizin əldə olunmasında bu tarixinin mühüm yeri olduğunu bildirib. Z.İbrahimov Azərbaycan xalqının xatirələri hörmətlə anılan şəhidlərin heç vaxt unudulmayacağını söyləyib.
ASC sədri bu qanlı hadisəyə ilk dəfə ümummilli lider Heydər Əliyevin öz münasibətini bildirdiyini xatırladıb. Zakir İbrahimov bildirib ki, ulu öndər 20 Yanvar gününün səhəri artıq Moskvada çıxış edərək bu hadisəni törədən şəxsləri kəskin şəkildə tənqid edib.
Qurumun rəhbəri bildirib ki, ölkə Prezidenti İlham Əliyevin bu qürurlu tarixin unudulmaması, gənc nəsillərə öyrədilməsi üçün hər il hadisənin ildönümünün keçirilməsi ilə bağlı tapşırıq verir və özü şəxsən anım tədbirlərində iştirak edir.
Sonra 20 Yanvarla bağlı film nümayiş olunub.
Bölmənin digər xəbərləri
