“Türk Dünyasına xidmət” mükafatlarının sahibləri məlum olub
Tbilisi, 2 yanvar, AZƏRTAC
Türkiyədə fəaliyyət göstərən Valeh Hacılar Beynəlxalq Elmi-Mədəni Araşdırmalar Vəqfinin 2025-ci il üzrə “Türk Dünyasına xidmət” mükafatlarının sahibləri məlum olub.
AZƏRTAC xəbər verir ki, Vəqfin qərarına əsasən, bu mükafata tanınmış filoloq-alimlər, professorlar Bədirxan Əhmədli (Azərbaycan), Asif Abbasoğlu Hacılı (Azərbaycan), İsenbike Togan (Türkiyə), Onur Er (Türkiyə), Orxan Aras (Türkiyə), şairlər Rafiq Hümmət (Gürcüstan) və Azər Sani Qafarov (Azərbaycan) layiq görülüblər.
Qeyd edək ki, adıçəkilən Vəqf 2010-cu ildə təsis edilib və Borçalı əsilli görkəmli alim Valeh Hacıların (Valeh Hacıyev) adını daşıyır.
Türk Mədəniyyəti və İrsi Fondunun Aparat rəhbəri Fəxri Hacıyev AZƏRTAC-a müsahibəsində deyib ki, Vəqfin əsas məqsədi və fəaliyyət istiqaməti türk xalqlarının mədəniyyəti, tarixi və ədəbiyyatının təbliği və tədqiqinə yardım göstərməkdir.
Onun sözlərinə görə, indiyədək bu istiqamətdə çox sayda önəmli layihələr həyata keçirilib, beynəlxalq elmi-mədəni tədbirlər təşkil olunub, kitablar və dərgilər yayımlanıb.
Vəqfin təsisçisi və idarə heyətinin sədri Bursa Uludağ Universitetinin professoru, tanınmış türkoloq Cengiz Alyılmazdır.
Türk Dünyasında xidmətlərinə görə fərqlənən elm və sənət adamları hər il Vəqf tərəfindən “Türk Dünyasına xidmət” mükafatı ilə təltif olunurlar.
Bölmənin digər xəbərləri
