Türk tədqiqatçı: Azərbaycanın Qarabağda ermənilərə yaratdığı imkanı Ermənistan da Qərbi azərbaycanlılar üçün yaratmalıdır
İstanbul, 27 avqust, Günel Karatepe, AZƏRTAC
Qərbin Türk millətinə qarşı düşmən münasibəti tarix boyu özünü büruzə verib. Bu gün Avropa İttifaqının bəzi ölkələri tərəfindən hər fürsətdə bu münasibətin davam etdirildiyi hər kəsə məlumdur. Onların ermənilər tərəfindən uydurulan yalanlara üstünlük vermələrinin əsas səbəblərindən biri isə mənfəətdir. Avropadakı erməni diasporu bu mənfəətin əsas qaynaqlarındandır. Bütün bunların təzahürü olaraq Avropa hər il qondarma “erməni soyqırımı”nı dilə gətirir. Bu gün Avropanın guya sülhə və bölgənin inkişafına töhfə verməsi üçün təyin edilən bəzi dairələri erməni separatçıları ilə təmaslar qurur və ya bu təmasları aktivləşdirir. Lakin ortada danılması mümkün olmayan bir fakt var ki, o da Prezident İlham Əliyevin rəhbərliyi ilə qəhrəman Azərbaycan Ordusunun torpaqları 30 ildən çox davam edən işğaldan azad etməsidir.
Bu fikirləri AZƏRTAC-a müsahibəsində Türkiyə-Azərbaycan Dostluq Dərnəkləri Federasiyası sədrinin müavini, İğdır Azərbaycan Evi Dərnəyinin rəhbəri, saxta “erməni məsələsi” üzrə tədqiqatçı-yazar Sərdar Ünsal ifadə edib.
“Bu faktın qarşısında bəzi Qərb dairələrinin məsələyə yanaşmasını, Qarabağda qondarma “hökumət” və onun qondarma “parlamenti”ni quran bir sıra erməninin dünyaya baxışını türklərin məşhur “Ac toyuq yuxusunda darı görər” atalar sözü ən gözəl şəkildə izah edir. Təbii ki, ermənilərin 44 günlük Vətən müharibəsində üzləşdikləri acı məğlubiyyət onların havadarlarını narahat etdi. Bunun nəticəsidir ki, bu gün başda Fransa olmaqla, bir sıra Qərb qüvvələri Azərbaycana düşmən gözü ilə baxmağa başlayıblar və bunu hər zaman sezmək mümkündür”, - deyə tədqiqatçı bildirib.
Avropanın bəzi ermənipərəst dairələrinin Azərbaycana qarşı təxribatlarının davam edəcəyini düşündüyünü söyləyən Sərdar Ünsal deyib: “Ermənilər, xüsusilə Xocalı və bu kimi bir çox digər soyqırımı törədən daşnaklar, onların havadarları unutmamalıdırlar ki, artıq Qarabağ həqiqi sahiblərinə qayıdıb. Qarabağ əsrlər boyu Türk yurdu olub və bu, belə də qalacaq. Artıq o torpaqlar üçrəngli Azərbaycan Bayrağı altında özünün inkişaf dövrünə qədəm qoyub”.
Hazırda Qərbi Azərbaycan İcmasının İğdır təmsilçisi kimi fəaliyyət göstərən müsahibimiz ermənilərin təxribatlarının bununla da bitmədiyini deyib. O qeyd edib ki, indi də ermənilər “Qərbi Ermənistan” adı altında yaratdıqları, nə olduğu bilinməyən televiziya kanalı vasitəsilə 21 Türkiyə vilayətini, eləcə də indiki Ermənistan ərazisində qalan Qərbi Azərbaycan bölgələrini erməniləşdirməyə cəhd göstərir, orada yayımlanan xəyali xəbərlərlə belə mövzuları gündəmə gətirməyə çalışırlar. Lakin ermənilərin Rusiya imperiyasının əli ilə o ərazilərə köçürüldüyü, Türkiyə torpaqlarında baş verənlər, azərbaycanlıların ötən əsrin müxtəlif dövrlərində Qərbi Azərbaycandan misli görülməmiş vəhşiliklərlə qovulması və bu kimi bir çox hadisələr tarixi sənədlərlə ortadadır.
“Qərbi Azərbaycanın əzəli türk yurdu, Azərbaycanın bir parçası olması həqiqətini tarixi sübutlar kimi, canlı şahidlər də bilir və bu həqiqətlər nəsildən-nəslə ötürülür. Necə ki, bu gün Azərbaycan Dövləti Qarabağ ermənilərinin öz evlərində yaşamaları üçün bütün imkanlar yaradır, biz də Qərbi Azərbaycana, Vətənimizə geri dönmək istəyirik. Bizim orada torpaqlarımız var. Çünki mənim ailəm də Qərbi Azərbaycandan min cür işgəncələrlə çıxarılanlardandır. Ata nənəm və onun ailəsi 1920-ci ildə ermənilərin İrəvana gəlmələrindən sonra başlayan qırğınlar səbəbindən Göy Məscidin yanında yerləşən Təpəbaşı məhəlləsindəki evlərini tərk edib qaçmaq məcburiyyətində qalıb. Hətta nənəmin atası ermənilər tərəfindən qətlə yetirilib. Bütün bunlar sənəd və sübutla ortadadır. Bugünkü Ermənistan çar Rusiyasının əli ilə Azərbaycan torpaqlarında qurulub. Biz bir gün bu torpaqlara qayıdacağıq, mən buna əminəm. Biz öz torpaqlarımızdan işgəncələrlə, zülmlə çıxarılmışıq. Bu gün Azərbaycanda olduğu kimi, Türkiyədə də yaşayan Qərbi azərbaycanlılar, onların övladları, nəvələri öz yurd yerlərinə qayıtmalıdırlar. Qərbin qeyd edilən bəzi dairələri əsl həqiqətlə qarşılaşmaq istəyirlərsə, bir az da dönüb bizə baxsınlar, bizi dinləsinlər”, - deyə o əlavə edib.
Bölmənin digər xəbərləri
