Türkiyə parlamenti ölkə tarixində ilk iqlim qanununu qəbul edib
Ankara, 3 iyul, AZƏRTAC
Türkiyə Böyük Millət Məclisi (TBMM) ölkə tarixində iqlimlə bağlı ilk qanun layihəsini qəbul edib.
AZƏRTAC xəbər verir ki, yeni tənzimləmənin məqsədlərindən biri 2053-cü ilə qədər Türkiyədə istixana qazı emissiyalarını sıfıra endirmək və Milli Müəyyən Edilmiş Töhfədə (NDCs) müəyyən edilmiş hədəflərə nail olmaqdır.
Ankaranın enerji siyasətinin prioritet istiqamətləri bərpaolunan enerji mənbələrindən aktiv istifadə və yaşıl texnologiyaların tətbiqidir.
Ölkənin 81 vilayətinin hər birində valilərin sədrliyi ilə iqlim dəyişikliyi üzrə Koordinasiya şuraları fəaliyyət göstərəcək və Milli Karbon Emissiyalarının Ticarət Sistemi yaradılacaq.
Qanun layihəsində iqlim dəyişikliyi üzrə yerli fəaliyyət planlarının, həmçinin su ehtiyatlarının səmərəli tənzimlənməsi və meşə sahələrinin artırılması strategiyalarının hazırlanması nəzərdə tutulur.
Digər məsələlərlə yanaşı, təsərrüfat subyektlərinin ətraf mühiti çirkləndirməsini minimuma endirmək üçün xammaldan istifadənin stimullaşdırılması da planlaşdırılır.
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
