TÜRKİYƏ RESPUBLİKASININ PREZİDENTİ ZATİ-ALİLƏRİ CƏNAB ABDULLAH GÜLƏ
Hörmətli cənab Prezident,
Əziz qardaşım,
Türkiyənin Birləşmiş Millətlər Təşkilatının Təhlükəsizlik Şurasının qeyri-daimi üzvü seçilməsi münasibətilə Sizi və Sizin simanızda bütün xalqınızı ürəkdən təbrik edirəm.
Beynəlxalq aləmdə ölkənizin artan rolunun birbaşa ifadəsi olan bu tarixi hadisə həm də Türkiyə diplomatiyasının böyük uğurudur. Baş Məclisdə keçirilən seçkilərin bu cür nəticələnməsi dünyada və regionda sülhün, təhlükəsizliyin və sabitliyin bərqərar olması yolunda Türkiyənin ardıcıl səylərinə dünya birliyi tərəfindən verilən yüksək qiymətdir.
Qardaş Türkiyənin hər bir vətəndaşına və bütün türk dünyasına fərəh gətirən bu xoş xəbərin sevincini Sizinlə birlikdə yaşayır, Təhlükəsizlik Şurasında Türkiyənin qarşıdakı məsul fəaliyyətinin hər cəhətdən səmərəli olacağına inamımızı ifadə etmək istəyirəm.
Belə bir xoş fürsətdən istifadə edərək Sizə və qardaş Türkiyə xalqına ən səmimi arzularımızı yetirirəm.
Hörmətlə,
İlham Əliyev
Azərbaycan Respublikasının Prezidenti
Bakı, 18 oktyabr 2008-ci il.
Bölmənin digər xəbərləri
