Türkiyə şirkəti Qazaxıstanın Aktau limanında multimodal hab tikmək istəyir
Bakı, 29 iyul, AZƏRTAC
Ankarada rəsmi səfərdə olan Qazaxıstan Prezidenti Kasım-Jomart Tokayev Türkiyənin “YDA Holding” şirkətinin rəhbəri Hüseyn Arslanı qəbul edib.
AZƏRTAC Türkiyə mediasına istinadla xəbər verir ki, Kasım-Jomart Tokayevə “YDA Holding”in Qazaxıstandakı investisiya fəaliyyəti barədə məlumat verilib. Xüsusilə, çoxşaxəli fəaliyyəti olan bu qrup Türküstan, Astana və Petropavlovskda xəstəxanaların tikintisi və istismarı üçün üç layihə üzərində işləyir.
Şirkət tezliklə “YDA Sənaye Parkı”nda istehsalın genişləndirilməsinə başlamağı, həmçinin Astanada sendviç panellər zavodunun tikintisini planlaşdırır.
Qazaxıstan Prezidentinə şirkətin Aktauda multimodal tranzit qovşağı yaratmaq planlarından da danışılıb.
Dövlət başçısı holdinqin Qazaxıstana olan strateji marağını və həyata keçirdiyi investisiya təşəbbüslərini yüksək qiymətləndirib.
Bölmənin digər xəbərləri
