Kiyev, 2 avqust, AZƏRTAC

Türkiyə Ukrayna ilə azad ticarət haqqında sazişi ratifikasiya edib.

AZƏRTAC bu barədə “Daily News Hurriyet” nəşrinə istinadla xəbər verir.

Saziş 2022-ci il fevralın 3-də imzalanıb, Türkiyə Prezidenti Rəcəb Tayyib Ərdoğan isə avqustun 1-də bu sənədi və ona əlavələri təsdiq edib.

“2023-cü ildə Türkiyə ilə Ukrayna arasında ikitərəfli ticarətin həcmi 7,3 milyard dollar təşkil edib”, - deyə Türkiyənin ticarət naziri Ömer Bolat avqustun 1-də Ukrayna Baş nazirinin birinci müavini Yuliya Sviridenko ilə görüşdən sonra bildirib.

O, azad ticarət zonasının qısa müddətdə həcmini 10 milyard dollara çatdıracağını vurğulayıb. Nazirin sözlərinə görə, Türkiyə Ukrayna ilə əməkdaşlığı gücləndirməyə, ümumi maraqlara əsaslanan qarşılıqlı ticarət və investisiyaları artırmağa davam edəcək.

Yuliya Sviridenko qeyd edib ki, Türkiyə ilə azad ticarət sazişinin ratifikasiyasının başa çatması Rusiya istisna olmaqla, bütün Qara dəniz ölkələrini onlar üçün qarşılıqlı faydalı olan vahid iqtisadi məkanda birləşdirəcək.

Onun sözlərinə görə, Türkiyə əslində, Ukrayna taxılının başqa ölkələrə tədarükü üçün mərkəzə çevrilib.

“Biz Türkiyədən Afrika ölkələrinə, o cümlədən Nigeriyaya 25 min ton, Sudana isə 15 min ton taxıl daşıyan gəmilər göndərmişik”, - deyə Ukrayna rəsmisi əlavə edib.

Digər əsas məsələlərə regional ticarət, gəmiçiliyin təhlükəsizliyi və Qara dənizin minalardan təmizlənməsi daxildir. İki ölkə arasında ticarətin əsas istiqamətləri metallurgiya, maşınqayırma, enerji, avtomobil və taxıl sahələridir.

Emil Hüseynli

AZƏRTAC-ın xüsusi müxbiri

Kiyev