Türkiyədə inşası tamamlanan 369 su obyekti istifadəyə verilib
İstanbul, 11 dekabr, AZƏRTAC
Türkiyənin Dövlət Su İşləri Baş İdarəsi tərəfindən inşası tamamlanan 369 obyektin kütləvi açılış mərasimi keçirilib.
AZƏRTAC xəbər verir ki, mərasimdə Türkiyə Prezidenti Rəcəb Tayyib Ərdoğan iştirak edib.
Tədbirdə çıxış edən Türkiyə Prezidenti bu açılışla ölkənin 66 vilayətində su bəndləri, içməli su hövzələri, seldən mühafizə qurğuları kimi ümumi investisiya dəyəri 53 milyard türk lirəsi olan 369 layihənin rəsmi istifadəyə verildiyini deyib.
Rəcəb Tayyib Ərdoğan Türkiyənin su ilə zəngin olmadığını, əksinə, dünya üzrə su çətinliyi çəkən ölkələr qrupuna daxil olduğunu qeyd edib.
“Türkiyə olaraq dünyanın iqlim dəyişikliyi ilə mübarizə səylərini fəal şəkildə dəstəkləyirik və bütün proseslərdə aparıcı rol oynayırıq. Birləşmiş Millətlər Təşkilatında brend halına gələn “Sıfır Tullantı” layihəmizlə torpağın və suyun ən böyük düşməni olan plastik tullantı probleminə davamlı həll yolları tapmağa çalışırıq. Allahın izni ilə 2053-cü ilə qədər xalis sıfır emissiya hədəfinə çatanadək səylərimizi artırmağa davam edəcəyik”,- deyə Türkiyə Prezidenti vurğulayıb.
Bölmənin digər xəbərləri
