Türkiyənin energetika naziri: Neft kəşfiyyatı zamanı üfüqi istiqamətli qazma sınaqdan keçiriləcək
Ankara, 3 yanvar, AZƏRTAC
Cari ildə Türkiyədə “qara qızıl” laylarının aşkara çıxarılması məqsədilə üfüqi istiqamətli qazma aktiv şəkildə sınaqdan keçiriləcək. Söhbət, xüsusilə şist neftinin kəşfiyyatı üçün yeni quyuların qazılmasının planlaşdırıldığı, ölkənin cənub-şərqində yerləşən Diyarbəkir vilayətinin ərazilərindən gedir.
AZƏRTAC xəbər verir ki, bu barədə Türkiyənin energetika və təbii sərvətlər naziri Alparslan Bayraktar bəyan edib.
Nazirin sözlərinə görə, Diyarbəkirdən gələn müsbət xəbərlər Türkiyənin bütövlükdə enerji xəritəsinə təsir göstərə bilər. Ölkədə qaz hasilatının artımına toxunan A.Bayraktar qeyd edib ki, yeni “Osman Qazi” dəniz platforması sayəsində Qara dənizin Türkiyə sektorunda yerləşən “Sakarya” yatağında hasilatın həcmi iki dəfə artırılacaq.
“‘Osman Qazi’ platforması sayəsində Türkiyənin qazpaylama sisteminə sutkada 9-10 milyon kubmetr mavi yanacaq veriləcək ki, bu da artıq 8 milyon abunənin yerli qazla təmin olunmasına imkan yaradacaq”, - deyə nazir bildirib.
O, istisna etməyib ki, 2028-ci ilə qədər Türkiyədə yerli qazdan istifadə edən abunəçilərin sayı 16-17 milyona çata bilər. “Bu, bizim məqsədimizdir və biz bu hədəfə doğru irəliləyirik”, - deyə A.Bayraktar vurğulayıb.
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
