TÜRKİYƏNİN XARİCİ İŞLƏR NAZİRİ ABDULLAH GÜLÜN MOSKVAYA SƏFƏRİ
AZƏRTAC-ın müxbirinin Ankaradan verdiyi xəbərə görə, Türkiyə baş nazirinin müavini, xarici işlər naziri Abdullah Gül Rusiya ilə ikitərəfli əlaqələrin perspektivlərini və aktual beynəlxalq problemləri müzakirə etmək ücün bu il fevralın 23-dən 26-dək Moskvada dördgünlük rəsmi səfərdə olacaqdır. Avrasiyada Rusiya-Türkiyə əməkdaşlığı, o cümlədən hərbi-texniki əməkdaşlıq, beynəlxalq terrorizmlə mübarizədə qarşılıqlı fəaliyyət məsələləri də danışıqların əsas mövzusu olacaqdır.
Abdullah Gülün RF-nin xarici işlər naziri İqor İvanovla, əmlak münasibətləri naziri Fərid Qazizulinlə danışıqlar aparacağı, habelə Moskva meri Yuri Lujkovla, Federasiya Şurasının sədri Sergey Mironovla görüşəcəyi gözlənilir.
Asiyada və Avropada vəziyyət, İraq və Yaxın Şərq problemlərinin nizama salınması, Kipr problemi, Cənubi Qafqazda vəziyyət danışıqların gündəliyinə daxil edilmiş məsələlər arasındadır.
Abdullah Gülü səfərdə Türkiyənin işgüzar dairələrinin böyük nümayəndə heyəti müşayiət edir.
Bölmənin digər xəbərləri
