AZƏRTAC-ın Kiyevdən aldığı xəbərə görə, Ukrayna MDB-dən çıxmaq məsələsini müzakirə etmir. Bunu ölkənin xarici işlər naziri vəzifəsini icra edən Boris Tarasyuk mətbuat konfransında bildirmişdir. “MDB-dən çıxmaq məsələsini heç kəs qaldırmır”, - deyən Tarasyuk əlavə etmişdir ki, indiki fəaliyyət formatında MDB-nin gələcəyi yoxdur və Birliyin son iclaslarında onun yenidən qurulması məsələsi təsadüfən müzakirə olunmamışdır. O demişdir: “Biz MDB-nin fəaliyyətində durğunluğun şahidiyik, ona görə də MDB-yə üzvlüyün məqsədəuyğun olub-olmaması suallarının ortaya çıxması təəccüb doğurmur”.
Tarasyuk bildirmişdir ki, Gürcüstan, Ukrayna, Azərbaycan və Moldovanın daxil olduqları GUAM təşkilatı MDB-nin alternativi deyildir və hər hansı bir ölkəyə qarşı yönəlməmişdir.
GUAM-ın növbəti zirvə görüşü mayın 22-də Kiyevdə olacaqdır. GUAM yenidən təşkilatlanaraq, “Demokratiya və inkişaf uğrunda təşkilat - GUAM” adlanacaqdır. Zirvə görüşündə təşkilatın nizamnaməsinin və birgə bəyannamənin imzalanması nəzərdə tutulmuşdur.
