Ukrayna nəşrində Ulu Öndər Heydər Əliyevdən bəhs edən məqalə dərc olunub
Kiyev, 6 may, AZƏRTAC
Ukraynanın “Kiyev diplomatik” nəşrində Ümummilli Lider Heydər Əliyevin anadan olmasının 102-ci ildönümü ilə bağlı məqalə dərc olunub.
AZƏRTAC xəbər verir ki, məqalənin müəllifləri həmvətənimiz - hüquq elmləri doktoru, professor, diplomat, Ukrayna Elmlər Akademiyasının akademiki Arif Quliyev və sosial kommunikasiyalar üzrə fəlsəfə doktoru Veronika Çerkalyukdur.
Məqalədə qeyd olunur ki, 1990-cı illərin mürəkkəb və böhranlı dönəmində Azərbaycanı dağılmaqdan xilas etmiş, müasir milli kimlik konsepsiyasını irəli sürmüş və çoxetnik mühitdə sabit dövlətin əsaslarını yaratmış Ümummilli Lider Heydər Əliyevin şəxsiyyəti xüsusi diqqətə layiqdir.
“Postsovet dövrünün başlanğıcında Azərbaycan Respublikası dərin siyasi xaos, iqtisadi dağılma və ərazi bütövlüyünün itirilməsi təhlükəsi ilə üz-üzə qaldı. Bu kritik məqamda xalq və siyasi elita nəzərlərini böyük idarəçilik təcrübəsinə malik, həm ölkə daxilində, həm də beynəlxalq arenada yüksək nüfuza sahib bir şəxsiyyətə - Heydər Əliyevə yönəltdi. Onun 1993-cü ildə hakimiyyətə qayıdışı Azərbaycanın yeni tarixi mərhələsinin başlanğıcı oldu: Heydər Əliyev yalnız daxili sabitliyi təmin etmədi, eyni zamanda, gələcəyin konseptual əsaslarını formalaşdıraraq “Azərbaycançılıq” ideyası üzərində qurulan milli ideoloji platformanı irəli sürdü”, - deyə məqalədə müəlliflər vurğulayırlar.
Məqalədə, həmçinin yazılır ki, Ulu Öndər Heydər Əliyev dərhal sabitləşdirmə tədbirlərinə başladı: münaqişəli bölgələrin demilitarizasiyası, dövlət idarəçiliyinin vertikal strukturunun bərpası, milli ordunun formalaşdırılması, xarici siyasətin regional güc mərkəzləri arasında balans əsasında yenidən qurulması həyata keçirildi. Nəticədə milli suverenlik prinsipi 1995-ci il Konstitusiyasında hüquqi baxımdan rəsmiləşdirildi.
Müəlliflər qeyd edirlər ki, Heydər Əliyevin dövlət rəhbərliyi təcrübəsi təkcə Azərbaycanın tarixi kontekstində deyil, həm də postsovet məkanında, xüsusən də Ukraynada baş verən dövlət quruculuğu proseslərinin müqayisəli təhlili üçün qiymətli materialdır. XXI əsrdə bir çox dövlətlər siyasi parçalanma, xarici müdaxilə, kimlik böhranı və effektiv institutların formalaşması ilə bağlı çətinliklərlə üzləşdikcə, Heydər Əliyevin timsalında təcəssüm olunan liderlik modeli xüsusi diqqətə layiqdir.
“Bu gün Azərbaycan dövləti, Azərbaycan xalqı Ulu Öndərin göstərdiyi yolla Prezident İlham Əliyevin və Birinci vitse-prezident, Heydər Əliyev Fondunun Prezidenti Mehriban Əliyevanın rəhbərliyi ilə gələcəyə doğru inamla addımlayır. Ulu Öndər Heydər Əliyevin vəsiyyəti yerinə yetirilib, onilliklər boyu davam etmiş haqsızlığa, ədalətsizliyə, hüquqsuzluğa son qoyularaq, ikili standartlar zərərsizləşdirilərək bütün Türk dünyasında qürur hissi ilə qarşılanır.
Otuz il ərzində təmin olunmayan suverenliyimiz və ərazi bütövlüyümüz Müzəffər Ali Baş Komandanın və Azərbaycan xalqının birliyi sayəsində bərpa edildi. BMT Təhlükəsizlik Şurasının 30 il ərzində icra olunmayan 4 qətnaməsi yerinə yetirildi və “Qarabağ Azərbaycandır!” ifadəsi işğaldan azad edilən bütün torpaqlarımızda təsdiq olundu, şanlı bayrağımız Qarabağ səmasında dalğalandı. 2025-ci ilin Azərbaycanda “Konstitusiya və Suverenlik İli” elan olunması isə dövlətçilik tariximizdə əldə edilən bu mühüm nailiyyətlərin və milli dəyərlərin bir daha təsdiqi kimi dəyərləndirilir”, - deyə məqalədə vurğulanır.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
