RƏSMİ XRONİKA
UKRAYNA VƏ AZƏRBAYCAN PREZİDENTLƏRİ ŞURASININ İLK İCLASI
Bakı, 9 aprel (AZƏRTAC). Aprelin 9-da Azərbaycan Prezidenti İlham Əliyevin və Ukrayna Prezidenti Viktor Yuşşenkonun təkbətək görüşü başa çatandan sonra iki ölkənin Prezidentləri Şurasının ilk iclası olmuşdur. İclasda Azərbaycan və Ukrayna nümayəndə heyətlərinin üzvləri də iştirak edirdilər.
Azərbaycan Prezidenti İLHAM ƏLİYEV iclası açaraq dedi:
-Hörmətli cənab Prezident!
Hörmətli qonaqlar!
Sizi Azərbaycanda bir daha salamlamaq istəyirəm. Hörmətli cənab Prezident, əminəm ki, Sizin rəsmi səfəriniz ölkələrimiz arasında dostluq münasibətlərinin daha da inkişafına və möhkəmlənməsinə kömək edəcəkdir. Bu gün biz qarşılıqlı maraq doğuran məsələlər, ikitərəfli əməkdaşlığımızla bağlı məsələlər barəsində geniş fikir mübadiləsi aparmışıq və ölkələrimiz arasında münasibətlərdə böyük dinamika olmasını vurğulamışıq. Münasibətlərimiz çox səmərəli, dinamik inkişaf edir, yaxşı nəticələr əldə olunmuşdur və ümid edirik ki, bu müsbət meyillər gələcəkdə də inkişaf edəcək və möhkəmlənəcəkdir. Biz regional əhəmiyyətli məsələləri də müzakirə etdik. Fikrimcə, biz regionda vəziyyət barədə ümumi fikrimizi və regional əməkdaşlıq üçün perspektivləri ifadə etmişik.
Bu gün Ukrayna və Azərbaycan Prezidentləri Şurasının birinci iclası keçirilir. Bu, əvvəl əldə edilmiş razılaşmaların nəticəsidir. Şura çərçivəsində biz öz həllini tələb edən məsələləri müzakirə edəcəyik. Bunlar iqtisadi əməkdaşlıq, energetika sahəsində və hərbi-texniki sahədə əməkdaşlıq məsələləridir. Bunlar Prezidentlər Şurasının bugünkü iclasının əsas mövzularıdır, lakin təbii ki, biz bununla kifayətlənməyəcəyik, çünki münasibətlərin formatı və iclasın gündəliyi kifayət qədər genişdir.
Mən bir daha dərin məmnunluğumu bildirmək istəyirəm ki, bu gün Siz Azərbaycana rəsmi səfər edirsiniz. Əminəm ki, bu səfərin nəticələri əməli cəhətdən də uğurlu olacaq və biz ölkələrimiz arasında münasibətlərin möhkəmlənməsi baxımından bundan sonra da irəliyə doğru gedəcəyik.
Bir daha xoş gəlmisiniz.
Sonra çıxış edən Ukrayna Prezidenti VİKTOR YUŞŞENKO dedi:
-Hörmətli İlham Heydər oğlu!
Hörmətli azərbaycanlı dostlar!
Hörmətli Şura üzvləri!
İlham Heydər oğlu ilə biz bir məsələdə həmrəyik ki, əgər ikitərəfli münasibətlərimizə qiymət verməli olsaq, bu münasibətlər ən yüksək statusa malikdir, bunlar siyasi əlaqələrin, nazirliklər və idarələr səviyyəsində əlaqələrin çox yüksək dinamikasına malik olan strateji tərəfdaşlıq münasibətləridir. Açıq demək istərdim ki, bu illər ərzində biz insani münasibətləri də çox fəallaşdırmışıq. Başqa sözlə desək, biz ikitərəfli münasibətlərin inkişafından tam razıyıq. Bu münasibətlərin çox yaxşı dinamikası var. Bu münasibətlər yaxşı nəticələr verir.
İqtisadi böhranın həm ticarətə, həm də iqtisadi əməkdaşlığa təsir göstərdiyi indiki vaxtda rəqəmlər bəlkə də bir qədər azalmış, ola bilsin, ciddi şəkildə azalmışdır. Biz başa düşürük ki, bu, bizim münasibətlərin problemlərinin təsiri deyildir. Çox güman ki, burada bizim iradəmizdən, Ukrayna və Azərbaycan tərəflərindən asılı olmayan amillər təsir göstərir. Buna görə də mən Prezidentlər Şurasının iclasının əvvəlində həm siyasi, həm iqtisadi, həm də işgüzar münasibətlərimizi yüksək qiymətləndirmək istərdim.
İkincisi. Əvvəlki görüşlərimizdə də dediyimiz kimi, münasibətlərimizin aydın inkişaf planının olması çox vacibdir. Ona görə də bu gün imzalanacaq “Tədbirlər planı” 2009-2010-cu illərdə münasibətlərimizin perspektivini, özü də təkcə Prezidentlər Şurası çərçivəsində deyil, həm də nazirliklərin, idarələrin və biznes dairələrinin qarşılıqlı münasibətləri çərçivəsində bu perspektivləri necə təsəvvür etməyimiz barədə suala ən aydın və dəqiq cavab olacaqdır.
######