Ukraynanın Bərpası Konfransında 1 milyard avrodan çox məbləğdə enerji müqavilələri imzalanacaq
Kiyev, 25 iyun, AZƏRTAC
Qdanskda keçirilən Ukraynanın Bərpası Konfransı çərçivəsində ölkənin enerji sektorunda fəaliyyət göstərən dövlət və özəl şirkətlər 1 milyard avrodan çox məbləğdə maliyyənin cəlb olunmasına dair sazişlər imzalayacaqlar.
AZƏRTAC xəbər verir ki, bunu telemarafonun efirində Ukraynanın Baş nazirinin birinci müavini, energetika naziri Denis Şmıqal bildirib.
Onun sözlərinə görə, artıq Böyük Britaniyanın “Urenco” şirkəti ilə Ukraynanın atom elektrik stansiyaları üçün nüvə yanacağının tədarükünə dair 210 milyon funt sterlinq məbləğində saziş imzalanıb.
“Bu gün, həmçinin ABŞ-nin “Eksim” bankı tərəfindən “Naftoqaz” üçün 300 milyon dollar, Avropa Yenidənqurma və İnkişaf Bankı tərəfindən “Ukrenerqo” üçün isə 90 milyon avro məbləğində maliyyənin ayrılmasına dair saziş imzalayırıq. Bundan başqa, dövlət və özəl şirkətlərimiz bu gün ümumi dəyəri 1 milyard avrodan çox olan daha 28 saziş imzalayır”, – deyə o bildirib.
Onun fikrincə, bu, qış mövsümü başlamazdan əvvəl Ukraynanın enerji sektoruna dəstək üçün mühüm irəliləyiş olacaq.
Nazir əlavə edib ki, Niderland ilə qış mövsümünə hazırlıq üçün 178 milyon avronun ayrılmasına dair saziş də imzalanıb. Yardım paketinə xüsusilə də qaz turbinləri və transformatorların alınması daxildir.
Bundan başqa, konfrans çərçivəsində Ukrayna və Dünya Bankı yenilənmiş Enerji Strategiyasının konsepsiyasını təqdim edəcəklər. D.Şmıqal vurğulayıb ki, iqtisadiyyatın bərpası üçün hərəkətverici qüvvəyə çevrilməli olacaq enerji sisteminin inkişafı üçün möhkəm əsas yaradılmalıdır.
Nazir ayrıca qeyd edib ki, bir gün əvvəl keçirilmiş “Enerji Ramştaynı”nın iclası artıq sistemli xarakter alır və iştirakçıların coğrafiyası genişlənir. Belə ki, formata Avropadan kənar ölkələr – Cənubi Koreya, Yaponiya və ABŞ də qoşulublar.
Xəbər verildiyi kimi, Qdanskda Enerji Məsələləri üzrə G7+ Koordinasiya Qrupunun iclası keçirilir. Ukraynanın enerji ehtiyaclarının müzakirəsinə 20 ölkə, Avropa İttifaqının nümayəndələri və 6 beynəlxalq təşkilat qoşulub. İclasın yekunlarına əsasən, tərəfdaşlar enerji infrastrukturunun bərpası və Enerjiyə Dəstək Fonduna əlavə töhfələrin verilməsi üçün azı 375 milyon avro ayrılacağını açıqlayıblar.
Bölmənin digər xəbərləri
