Bakı, 13 oktyabr, AZƏRTAC

Prezident İlham Əliyev bu günlərdə Cəbrayıl rayonuna səfər edərək, burada mühüm infrastruktur obyektlərinin təməlini qoydu. Dövlətimizin başçısının rayon ictimaiyyətinin nümayəndələri ilə çıxışı cəbrayıllılar tərəfindən dərin razılıq hissi ilə qarşılanıb. “Qarabağa aparan yol” qəzetinin baş redaktor müavini əslən Cəbrayıl rayonundan olan Fariz Çobanoğlu bu barədə fikirlərini AZƏRTAC ilə bölüşərkən deyib:

-Cəbrayılın işğalından sonra yurd həsrəti, Vətən nisgili ilə dolu qəlbimi götürüb “Qarabağa aparan yol” qəzetinə gəldim. Adından da göründüyü kimi, ünvanımız, mövqeyimiz gün kimi bəlli idi. Prezident İlham Əliyevin yürütdüyü daxili və xarici siyasətə qəzetimizdəki yazılarla dəstək verməyə çalışırdıq. Biz də Vətən qarşısındakı borcumuzu qələmimiz, sözümüz, duyğu və düşüncələrimizlə yerinə yetirirdik. İçimizdə inam və güvənc adlı qüvvəni daim qoruyur, sabaha ümidlə baxırdıq. Haqqı, ədaləti başının tacı hesab edən Prezidentimizə arxalanır, xalqımızın iradəsinə, qeyrətinə güvənirdik. “Qarabağa aparan yol”umuza rişxəndlə baxanlar da oldu: yəni belə bir yol var? Bu sayaq ümidsiz, inamsız baxışlar qəlbimizi göynətsə də, yolumuzdan dönmədik. Zaman gəlib yetişdi. Prezidentimizin uğurlu siyasəti və ordumuzun, xalqımızın birliyi sayəsində “Qarabağa aparan yol” hər mənada həqiqətə çevrildi. Həm bizim qəzetin ünvanına, həm də Qarabağımıza günəş doğdu. Düşmən önündə xəcalətdən, necə deyərlər, yağı qəsbindən xilas olduq. 44 günlük müharibə xalqımızın qətiyyətini, gücünü, iradə və əzmini ortaya qoymuş oldu. 30 ilə yaxın bir müddətdə çəkdiyimiz Vətən həsrəti, bütün çətinliklər, ağrı və məşəqqətlər geridə qaldı.

Müharibə ərəfəsində təkcə ordumuz döyüşmədi, bütün xalq döyüşdü - Prezident də müharibənin ön sırasında, ön cəbhəsində. Nəyə görə belə deyirəm? Müharibənin bir tərəfi həm də informasiya cəbhəsi, informasiya savaşı idi. Prezident qanlı çarpışmalar, döyüşlər zamanı həm ordunu idarə edir, həm də informasiya savaşında yenilməz bir şücaətlə döyüşürdü. Onun dünya mediasına, dünyanın nüfuzlu televiziya kanallarına, agentliklərinə verdiyi müsahibələr haqlı, ədalətli mövqeyimizi beynəlxalq ictimaiyyətinin gözü önünə qoyurdu. Özü də ən sərt detallar, ən dərin düşüncə və aydın fikirlər müstəvisində. Demək olar ki, Prezidentin bütün çıxışlarını, müsahibələrini izlədim. Bu müsahibələr çox mükəmməldir. Dünyada barmaqla sayılacaq belə liderlər, ictimai-siyasi xadimlər ola bilər ki, Prezidentimiz qədər dərin mühakimə yürütmək qabiliyyətində olsun. Danışdığı, istifadə etdiyi xarici dilləri də doğma dilimiz qədər səlis və aydın tələffüz edir. Onun ən güclü silahlarından biri də elə bu dillərdə mükəmməl danışa bilməsidir.

Prezidentimizin Müzəffər Ali Baş Komandan kimi həm müharibə dövründə, həm də qələbədən sonrakı mərhələdə işğaldan azad edilmiş rayon və şəhərlərimizə səfərləri də qeyd olunmalıdır. O, səfərlər vasitəsilə də dünyanın diqqətini getdiyi yerlərə yönəldir, erməni vandalizminin, erməni vəhşiliyinin misli görünməmiş miqyasını bir daha dünyanın aparıcı dövlətlərinə və dünya xalqlarına göstərmiş olurdu. Müzəffər Ali Baş Komandanın azad olunmuş ərazilərimizə qələbədən sonrakı səfərləri Qarabağda yeni bir həyatın canlanmasına, erməni vandalizmindən qurtulmuş Vətənin xarabalıqları yerində şəhərlərimizin, kəndlərimizin bərpasına yönəlmiş ən böyük addımlardan biridir - Qarabağın azad və xoşbəxtliyinə doğru hesablanmış addım. Açığını deyim ki, Prezident hər dəfə Şuşaya, Füzuliyə, Ağdama, Zəngilana səfər edəndə içimdə şirin bir qısqanclıq yaranırdı: Bəs, görəsən, Cəbrayıla nə zaman səfər edəcək?

Əslində isə hər şey plan üzrə imiş. Prezident Cəbrayıla - özünün də dediyi kimi, erməni faşizminin belinin qırıldığı yerə onun işğaldan azad olunduğu gün gələcəkmiş. Axı Prezidentimiz nəyi nə zaman edəcəyini hər kəsdən yaxşı bilir. Həqiqətən də, onun oktyabrın 4-də Cəbrayılın işğaldan azad olunduğu gün bu yerə gəlməsi ictimaiyyət tərəfindən xüsusi bir məhəbbət, ehtiramla qarşılandı. Hələ Prezidentimiz Cəbrayılın yeni salınmış Cocuq Mərcanlı kəndinin açılışında demişdi ki, bu, Qarabağa Böyük Qayıdışın ilk müjdəsidir. Cəbrayıl ictimaiyyəti ilə görüşündə demişdi ki, bu gün mən sizi bura qonaq çağırmışam. Zaman gələcək siz məni bura qonaq çağıracaqsınız. Prezidentimizin dedikləri hər zaman həqiqət olur. O nəyi deyib, nəyi vəd edibsə, zamanla hamısı gerçək olub. El arasında buna sözünün ağası olmaq deyirlər. Prezidentimizi xalqımıza sevdirən ən ümdə cəhətlərdən biri də elə budur - gümanları, ümidləri, ehtimalları həqiqətə çevirmək.

Prezidentimizin Cəbrayıl torpağında - doğulduğum yurdda bu yerin tanınmış ziyalıları, elm və sənət adamları, zəhmətkeşləri ilə görüşü məni çox sevindirdi, çox duyğulandırdı. Dövlətimizin başçısı Cəbrayılda “KamAZ” ASC ilə “Gəncə Avtomobil Zavodu” İstehsalat Birliyinin birgə servis mərkəzinin, Şərqi Zəngəzur iqtisadi rayonunda yaradılacaq “Araz Vadisi İqtisadi Zonası” Sənaye Parkının, Cəbrayıl Memorial Kompleksinin və Cəbrayıl şəhərinin bərpasının, rayon Mərkəzi Xəstəxanasının, məktəb binasının və Cəbrayıl şəhərində ilk çoxmənzilli yaşayış məhəlləsinin təməlini qoyub, 110/35/10 kV-luq “Cəbrayıl” yarımstansiyasının, Dövlət Sərhəd Xidmətinin hərbi hissə kompleksinin açılışlarında iştirak edib.

Bütün bunlar hamı kimi məni də sevindirməyə bilməz. Çünki doğma torpağımızın, ata-baba yurdumun viran qalmış xarabalıqlarına yeni bir həyat gələcək. Zəngəzurun qapısı Cəbrayıl torpağı çiçək açacaq, gül bitirəcək. Cəbrayıl Azərbaycan elminə, mədəniyyət və incəsənətinə çox böyük simalar bəxş edib. Bu baxımdan Cəbrayılda məşhur akademik Mehdi Mehdizadə adına - əsası 1876-cı ildə qoyulmuş 145 yaşlı orta məktəbin təməlinin yenidən qoyulması da çox sevindirici haldır. Hətta bu günlərdə mətbuatdan akademik Mehdi Mehdizadənin Rusiyanın Moskva şəhərində yaşayan qızı Zenfira Mehdizadənin Prezidentə ünvanladığı yığcam təşəkkür məktubunu da qürur hissi ilə oxudum.

Məktub demişkən, yadıma düşür ki, müharibə ərəfəsində ölkəmizin müxtəlif şəhər və rayonlarından, ən ucqar kəndlərimizdən Prezidentə saysız-hesabsız təşəkkür məktubları gəlirdi. Bu məktubların ruhunda Prezidentin xalqla bir olduğu, bir hədəfə atəş açdığı duyulur, hiss olunurdu. Belə məktublardan vaxtaşırı bizim redaksiyamıza da gəlir, biz o məktubları qəzetimizdə dərc edir, yüzlərlə oxucuya çatdırırdıq.

Bir sözlə, bütün mübarizələrimizin sonunda birliyimiz - Prezident, xalq, ordu vəhdəti qələbə qazandı. Biz birləşib hamılıqla birlikdə haqq çırağını yandıra bildik. Qələbəmizdə hər kəsin payı var. Azərbaycanda yaşayan hər bir xalqın nümayəndəsi öz Vətəni - Azərbaycan uğrunda səfərbər olmuşdu.

Prezidentin Cəbrayıl ictimaiyyəti ilə görüşündə təəssüratlarını bölüşən hər bir sakinin dövlətimizin başçısına və ordumuza minnətdarlığı duyulurdu. Eyni zamanda, Prezidentin sakinlərlə olduqca səmimi davranışı da onların qəlbindən gələnləri səmimi şəkildə ifadə etməsinə səbəb olurdu. Bir məqam mənə xüsusilə xoş gəldi. Cocuq Mərcanlıda uzun illər düşmən əhatəsində yaşayan ailə başçısı Oktay Həziyev də çıxış etdi. Prezident Oktay Həziyevin mərdliyini, cəsarətini, vətənpərvərliyini xüsusi qiymətləndirdi.

Ümumiyyətlə, Cəbrayıl ictimaiyyəti ilə görüşdə hər kəs səmimi idi. Doğma yurda qovuşmaq hisslərini ən təbii şəkildə paylaşmaq qədər səmimi... Görüşdə bir məqam da diqqətimi çəkdi. Belə ki, kadrlarda Cəbrayılın ermənilər tərəfindən xarabaya çevrilmiş yerləri görünürdü. Ermənilər evlərin, tarixi binaların, ziyarətgahların, məbədlərin, qədim mədəniyyət ocaqlarının izlərini də itirməyə çalışıblar. Prezident hər dəfə işğaldan azad olunmuş ərazilərə səfər edərkən bilərəkdən belə yerləri seçir. Seçir ki, biz erməni vəhşiliyini, erməni vandalizmini tanıdığımız qədər dünya da görsün, tanısın. Bəli, Prezidentimiz bizi hər zaman dünyaya tanıdır: çəkdiyimiz iztirablar, əzablarla birgə qovuşduğumuz səadətin aydın və şəffaf görünən mənzərəsinə qədər.

Bir məsələyə də heyranlığımı bildirmək istəyirəm. Prezident hər dəfə “mən” deyəndə Azərbaycanı, Azərbaycan xalqını nəzərdə tutur. Müzəffər Ali Baş Komandanın azad olunmuş Suqovuşandan, elə həm də Araz vadisindən verdiyi mesajlar bunu bir daha təsdiq edir. “Mən indi Suqovuşandayam, mən Hadrutdayam, mən Cəbrayıldayam, mən Zəngilandayam, mən Şuşadayam, mən Xocavənddəyəm, mən hər yerdəyəm. Bu, o deməkdir ki, Azərbaycan, Azərbaycan xalqı indi hər yerdədir. Dünyanın hər yerində...