VENİSİYÖ MƏSCİDİNİN İMAMI FRANSADAN ÇIXARILACAQ

23.04.2004 [19:00]
Çap et
A⁺ A^-

AZƏRTAC-ın müxbiri xəbər verir ki, Fransa hökuməti Venisiyö şəhərindəki əl-Farkan məscidinin 52 yaşlı imamı Əbdülqədir Büzianın ölkədən çıxarılmasını qərara almışdır. Buna imamın Lionda çıxan “Lion Maq” jurnalına verdiyi müsahibə səbəb olmuşdur. Müsahibədə imam Fransada islamın təbligi ilə yanaşı, qadınlar barədə radikal fikirlər də söyləmişdir. Nəinki Fransanın, habelə bütün dünyanın müsəlmanlaşması arzusunu ifadə edən imam guya Quranda ərin arvadı döyməsinə icazə verildiyini, qadının kişi ilə birlikdə işləməsinə qadağa qoyulduğunu iddia etmiş və çoxarvadlılığa haqq qazandırmışdır.

İki arvaddan 16 uşağı olan imamın belə çıxışı Fransa ictimaiyyətində, xüsusilə qadınlarda böyük narazılıq doğurmuşdur. Onlar ölkənin hüquq orqanlarından imam barədə ciddi ölçü götürməyi və onun ölkədən çıxarılmasını tələb etmişlər.

Hökumət imamın arzuolunmaz bir şəxs kimi Fransadan çıxarılaraq, vətəni Əlcəzairə göndərilməsini qərara almışdır.

Xatırladaq ki, bundan bir qədər əvvəl Fransanın Brest şəhərinin imamı da radikal fikirlərinə görə ölkədən çıxarılaraq Əlcəzairə göndərilmişdir.