Vərəm təkcə tibbi deyil, həm də sosial problemdir
Masallı, 21 oktyabr, Bağır Əliyev, AZƏRTAC
Vərəm əleyhinə QHT Koalisiyasının üzvləri Masallı rayonuna səfər ediblər.
AZƏRTAC-ın bölgə müxbiri xəbər verir ki, qonaqlar əvvəlcə Masallı Rayon Ağciyər Xəstəlikləri Xəstəxanasına baş çəkərək burada müalicə alan xəstələrin vəziyyəti ilə maraqlanıb, onlara sovqatlar paylayıblar.
Daha sonra Koalisiyanın təşkilatçılığı ilə Masallı şəhərindəki Gənclər Mərkəzində vərəmlə bağlı maarifləndirici elmi-praktiki konfrans keçirilib.
Tədbirdə “Sağlamlığa Xidmət” İctimai Birliyinin sədr müavini Pərvanə Vəliyeva tədbirin məqsədi və Koalisiyanın vərəmlə mübarizə tədbirləri haqqında təqdimatla çıxış edib.
Koalisiyanın sədri Elçin Muxtarlı vərəm xəstəliyi və dünyada bu xəstəliklə bağlı Ümumdünya Səhiyyə Təşkilatının yaydığı faktlar barədə məlumat verib.
Masallı Rayon Ağciyər Xəstəlikləri Xəstəxanasının baş həkimi Mirrəhim Nəbiyev rayonda vərəmlə bağlı hazırkı vəziyyət barədə məlumat verərək ona ünvanlanmış sualları cavablandırıb.
Həkim-koordinator Samirə Məmmədova vərəm, onun yayılma yolları, profilaktikası və müalicəsi haqqında söz açıb.
Azərbaycan Qızıl Aypara Cəmiyyətinin “İcmaya əsaslanan sağlamlıq” Proqramının rəhbəri Mətanət Qaraxanova Azərbaycan rəhbərlik etdiyi qurumun və Beynəlxalq Qızıl Xaç Komitəsinin vərəmlə mübarizə sahəsində gördüyü işlərdən danışıb.
“Həyat Humanitar Dəstək” İctimai Birliyinin koordinatoru Zəminə Səfərova çıxışında bildirib ki, vərəmə yalnız insanların sosial-iqtisadi həyat şəraitlərini yaxşılaşdırılması ilə qalib gəlmək olar. Vərəm təkcə tibbi deyil, həm də sosial problemdir. Xəstələrin müalicə müddəti ərzində dövlət tərəfindən hər hansı sosial müavinətlə təmin olunması yüksək sağalma nəticələrinə təkan verə bilər.
Azərbaycan Qızıl Aypara Cəmiyyətinin layihə koordinatoru Sona Hacıyeva vərəmli xəstələrə yönəli ayrıseçkiliyin aradan qaldırılmasının vacibliyini gündəmə gətirib.
Çingiz Ramazanlı çıxışında koordinatoru olduğu mülki sektorda keçmiş vərəmli məhkumların izlənilməsi və müalicəsi proqramından, cəzaçəkmə müəssisələrində azadlığa çıxmış xəstələrin dərmanla təminatı, psixoloji dəstəyin göstərilməsi və onların yenidən cəmiyyətə normal insan kimi qaytarılmasından danışıb.
“Vərəmsiz gələcəyə doğru” İctimai Birliyinin üzvü Amal Allahverdiyev vərəmli xəstələrə qarşı münasibətin dəyişməsinin, stiqma və stereotiplərin qırılmasının vacibliyindən bəhs edib.
Masallı Rayon Təhsil Şöbəsinin əməkdaşı Əyyar Burhanov rayonun təhsil ocaqlarında infeksion xəstəliklərlə mübarizə mövzusunda keçirilən maarifləndirici tədbirlər barədə məlumat verib, region gənclərini, könüllüləri bu təbliğat kampaniyalarında fəal iştirak etməyə çağırıb.
Daha sonra vərəmlə mübarizə üzrə Avropa Koalisiyasının maliyyə dəstəyi ilə ərsəyə gətirilmiş maarifləndirici bədii film nümayiş etdirilib, tədbir iştirakçılarını maraqlandıran suallar cavablandırılıb.
Sonda vərəmlə mübarizədə vətəndaş cəmiyyətində göstərdiyi dəstəyə görə vərəm dispanserinin baş həkimi Əzizulla Əliyev, həkim Zəkəriyyə Babayev, Zülfüqar Zülfüqarov, “Yeni həyat” qəzetinin əməkdaşı Akif Ağayev və başqaları Koalisiya rəhbərliyi tərəfindən mükafatlandırılıblar.
Tədbir iştirakçılarına maarifləndirici flayerlər, buklet və kitabçalar paylanılıb.
Bölmənin digər xəbərləri
