Lənkəran, 6 mart, İsmayıl Cəfərli, AZƏRTAC

Vətən müharibəsində əldə olunan qələbəmizdə idmançılarımızın da payı az deyil. Onlar idman yarışlarında olduğu kimi, gərgin döyüşlərdə də mərdlik, qorxmazlıq və şücaət göstərərək adlarını qızıl hərflərlə zəfər salnaməmizə əbədi yazdılar. Bu qəhrəmanlardan biri də Vətən müharibəsində Şuşayadək döyüş yolu keçən Orxan İmaməliyevdir.

AZƏRTAC xəbər verir ki, Orxan Elşad oğlu İmaməliyev 1992-ci ildə Lənkəran şəhərində dünyaya göz açıb. Orta və ali təhsilini Rusiyada alan Orxan atasının istəyi ilə əsgərliyini doğma Vətənində, Azərbaycanda keçirib. Uşaqlıqdan idmana böyük maraq göstərən Orxan İmaməliyev həvəskar kimi boks idman növü ilə məşğul olub. Həqiqi hərbi xidmətini Daxili Qoşunlarda keçirən qəhrəmanımız idman göstəriciləri ilə həmişə komandanlığın böyük rəğbətini qazanıb. Xidmətdən sonra həvəskar boksçu kimi özünü qarışıq idman növündə də sınayıb. Hərbi xidmətdən sonra müxtəlif sahələrdə işləsə də, 2016-cı ildən yenidən ordu sıralarına qayıdaraq Daxili Qoşunların N saylı hərbi hissəsində müddətdən artıq hərbi qulluqçu kimi xidmət edib.

O, idmanda qazandığı nailiyyətləri döyüş meydanında da təkrarlayıb. Ermənilərin xeyli canlı qüvvəsini məhv etməklə şəhidlərimizin intiqamını alan Orxan Vətən müharibəsində qazanılan zəfərlərdə onun da payının olması ilə qürur duyur: “Dörd ildir ki, qaydasız döyüşlə, peşəkar idmanla məşğul oluram. Mən də cəsur igidlərimiz kimi müharibədə iştirak etdiyim üçün çox şadam. Bu, mənim arzum idi. Hər bir kəsin borcudur ki, doğulduğu torpağı qorusun və onun uğrunda hər an savaşa hazır olsun. Müharibə başlayanda mən Tərtərdə xidmət edirdim. Elə döyüşlərə də o istiqamətdən başladıq. Rayonlarımızın azad olunması uğrunda döyüş əməliyyatlarında iştirak etmişəm. Füzuli, Cəbrayıl, Xocavənd, Hadrut, Tuğ, Daşaltı uğrunda döyüşmüşəm. Axırıncı döyüşümüz Şuşa istiqamətində oldu. Bütün şəhidlərimizin ruhu qarşısında baş əyirəm”.

Qarabağın düşmən işğalından azad edilməsində, ümumilikdə, 478 idmançımız döyüşüb. Onlardan 54 nəfəri şəhid olub, 51-i yaralanıb, 2 idmançımız isə itkin düşüb. Orxanın müəllimi Zaur Məmmədov deyib ki, Vətən müharibəsində qazanılan qələbədə onun tələbələrinin də payı var: “İdmançı qəhrəmanlarımız öz uğurlu nəticələrini yarış meydanlarında olduğu kimi, döyüşdə də göstərdilər. Vətən müharibəsində 15-dən artıq tələbəm iştirak etdi. Çox acı olsa da, 5 tələbəm şəhidlik zirvəsinə yüksəldi. Dörd tələbəm isə qazi oldu. İgid tələbəm Orxan da qalib ölkənin qalib döyüşçüsü kimi alnıaçıq, üzüağ qayıtdı”.

Qırx dörd davam edən haqq savaşımızın sonunda Orxan kimi igidlər Azərbaycan xalqının Vətənə necə bağlılığını, onun üçün gözünü qırpmadan canından keçməyə hazır olduğunu bir daha nümayiş etdirdi. 28 yaşlı idmançı və Vətən müharibəsi iştirakçısı olan Orxan İmaməliyev bildirib ki, Azərbaycan pəhləvanları idmanda olduğu kimi, müharibədə də öz sözlərini deyiblər. Ölkəmizin qeyrətli oğulları yarış və döyüş meydanlarında düşmənə layiqli dərs veriblər.