Vətən uğrunda şəhid olanların xatirəsini daim yad etmək gənclərin borcudur
Bakı, 20 yanvar (AZƏRTAC). Azərbaycan xalqının tarixinə Qanlı Yanvar faciəsi kimi daxil olmuş 1990-cı ilin 20 Yanvar hadisələrində Vətən uğrunda şəhid olanların xatirəsini daim yad etmək gənclərin borcudur.
Bu sözləri AZƏRTAC-a müsahibəsində Azərbaycanda təhsil alan türkiyəli tələbə Leyla Ünal demişdir. O, böyük qürur hissi ilə artıq dördüncü ildir ki, hər bir azərbaycanlı üçün müqəddəs and yerinə çevrilmiş Şəhidlər xiyabanına ziyarətə gəldiyini söyləmişdir. Bildirmişdir ki, burada Azərbaycanın azadlığı uğrunda şəhid olmuş türk əsgərlərinin məzarlarını da ziyarət edir.
Türkiyəli tələbə əlavə etmişdir ki, hər il yanvarın 20-də minlərlə azərbaycanlının Vətənin azadlığı və suverenliyi uğrunda canlarından keçmiş oğul və qızlarının əziz xatirəsini ehtiramla yad etməsi məni heyrətə gətirir. Mən də hər il tələbə yoldaşlarımla bu müqəddəs ünvana gəlməyi özümə şərəf bilirəm.
Leyla Ünal vurğulamışdır ki, 20 Yanvar təkcə faciə və hüzn günü kimi qiymətləndirilməməlidir. Bu hadisə həm də Azərbaycan xalqının azadlıq, müstəqillik, demokratiya, ərazi bütövlüyü uğrunda mübarizəsinin, dünyanı heyrətə gətirən mərdliyinin, igidlik və ədalətsevərliyinin böyük təntənəsidir.
Bölmənin digər xəbərləri
