“VİCDAN SUSANDA” ROMANININ YENİ NƏŞRDƏ TƏQDİMATI OLMUŞDUR
Bakı, 3 iyun (AZƏRTAC). İyunun 3-də M.F.Axundov adına Milli Kitabxanada müasir Azərbaycan ədəbiyyatının sayılıb-seçilən nümayəndələrindən biri, çoxsaylı roman və povestlərin müəllifi, əməkdar incəsənət xadimi, Prezident təqaüdçüsü Vidadi Babanlının “Vicdan susanda” romanının yeni nəşrinin təqdimatı olmuşdur.
Tədbirin əvvəlində qonaqlar Vidadi Babanlının həyat və yaradıcılığına həsr olunmuş kitab sərgisi ilə tanış olmuşlar.
Milli Kitabxananın direktoru Kərim Tahirov, tanınmış şair Taleh Həmid, AMEA-nın müxbir üzvü, Azərbaycanda Atatürk Mərkəzinin rəhbəri, Milli Məclisin mədəniyyət məsələləri komitəsinin sədri Nizami Cəfərov, professor Camal Mustafayev və digərləri Azərbaycan ədəbiyyatında V.Babanlının özünəməxsus yerindən, illər keçdikcə əsərlərinə marağın daha da artmasından söhbət açmışlar. Natiqlər həyatını bütünlüklə sözə həsr edən görkəmli nasirin əsərlərinin gənclərin mənəvi-əxlaqi tərbiyəsində mühüm rol oynadığını diqqətə çatdırmış, ədəbiyyatımızın ideya və sənətkarlıq baxımından inkişafına uzun illər, yorulmadan, vicdanla xidmət etdiyini bildirmişlər.
Vidadi Babanlı tədbirin təşkilatçılarına təşəkkür etmiş, ünvanına deyilmiş xoş sözlərə görə minnətdarlığını bildirmişdir.
Kitab “Çaşıoğlu” nəşriyyatında çap edilmişdir.
######
 |
 |
Bölmənin digər xəbərləri
