Vilnüsdə Bakıdakı Qanlı Yanvar hadisələrinə həsr olunmuş mərasim keçirilmişdir
Vilnüs, 20 yanvar (AZƏRTAC). Vilnüsün Ratuşa meydanında Bakıda 1990-cı ilin Qanlı Yanvar faciəsi qurbanlarının xatirəsi yad edilmişdir.
Meydana Litvada yaşayan bir çox soydaşlarımız, Vilnüsün ali məktəblərində təhsil alan azərbaycanlı tələbələr, “Darbas” Gənclər Təşkilatının Vilnüs şöbəsinin üzvləri toplaşmışdılar.
Azərbaycanın dövlət bayrağının rəmzi olan aypara və səkkizguşəli ulduz şəklində düzülmüş 130-dan çox şölələnən şam bir neçə dəqiqə Ratuşa meydanını işıqlandırmışdır.
Tədbirdə 1990-cı ilin yanvarında Bakıda baş vermiş qanlı hadisələrdən danışılmışdır. Qeyd edilmişdir ki, uzun müddət dünya ictimaiyyətinin bu hadisələr, xüsusilə dinc insanların qətli barədə ətraflı məlumatı olmamışdır.
Anma mərasimində Azərbaycanın Litvadakı səfirliyinin nümayəndəsi də iştirak etmişdir. Tədbirin iştirakçıları Qanlı Yanvar hadisələri zamanı həlak olanların xatirəsini bir dəqiqəlik sükutla yad etmiş və belə faciəli hadisələrin bir daha təkrarlanmayacağına ümid və inam rəmzi kimi Vilnüs səmasına 134 ağ hava şarından birini buraxmışlar.
Tədbir azəri.lt komandası və “Darbas” Gənclər Təşkilatının Vilnüs şöbəsi tərəfindən təşkil olunmuşdur.
Nigar Hüseynova
AZƏRTAC-ın xüsusi müxbiri
Vilnüs
Bölmənin digər xəbərləri
