Vyetnam Milli Universitetinin kitabxanasında Azərbaycan guşəsi açılıb
Hanoy, 10 may, AZƏRTAC
Azərbaycanın Vyetnamdakı səfirliyinin dəstəyi ilə Vyetnam Milli Universitetinin kitabxanasında Azərbaycan guşəsi açılıb. Ulu öndər Heydər Əliyevin anadan olmasının ildönümü gününə təsadüf edən açılış mərasimində universitetinin tələbə-müəllim heyəti, tədqiqatçılar, Azərbaycanın Mədəniyyəti və Tarixinin Araşdırmaları Mərkəzinin, Vyetnam-Azərbaycan Dostluq Təşkilatının nümayəndələri, jurnalistlər iştirak ediblər.
Azərbaycanın Vyetnamdakı səfiri Anar İmanov ümummilli lider Heydər Əliyevin sovet dövründə və müstəqillik illərində ölkəmizə rəhbərlik etdiyi zaman əldə edilmiş uğurlar, keçmiş Sovet İttifaqı ilə Vyetnam arasında münasibətlərin genişləndirilməsində, o cümlədən Vyetnam iqtisadiyyatının sürətli inkişafında Azərbaycanın rolu, bu istiqamətdə kadrların hazırlanması məqsədilə Vyetnamdan olan tələbələrin Azərbaycanda təhsil almasından bəhs edib.
Səfir Ermənistanın Azərbaycana qarşı hərbi təcavüzü, Dağlıq Qarabağ münaqişəsi, xalqın tələbi ilə 1993-cü ildə ümummilli lider Heydər Əliyevin yenidən Azərbaycanda hakimiyyətə qayıtması və dövlətimizin müstəqilliyinin gücləndirilməsi istiqamətində atdığı addımlar haqqında ətraflı məlumat verib.
Səfir 1983-cü ildə Heydər Əliyevin SSRİ Nazirlər Soveti sədrinin birinci müavini vəzifəsində çalışarkən Vyetnam Sosialist Respublikasına səfərinin xalqlarımız arasında əlaqələri daha da möhkəmlətdiyini xüsusi qeyd edib.
A.İmanov müasir Azərbaycan dövlətinin banisi Heydər Əliyevin layiqli davamçısı Prezident İlham Əliyevin 2014-cü ilin mayında Vyetnama rəsmi səfərinin iki ölkə arasındakı münasibətlərdə dönüş nöqtəsi rolunu oynadığını bildirib. Səfir Prezident İlham Əliyevin yürütdüyü uğurlu xarici və daxili siyasət nəticəsində Azərbaycanın regionda müasir, güclü dövlətə çevrilərək sürətlə inkişaf etdiyini, Cənubi Qafqaz bölgəsində müxtəlif genişmiqyaslı layihələrin həyata keçirildiyini qeyd edib.
Azərbaycanın Mədəniyyəti və Tarixinin Araşdırmaları Mərkəzinin rəhbəri Dao Xuan Tien Azərbaycan xalqının ümummilli lideri Heydər Əliyevin dünyanın görkəmli siyasətçiləri arasında ön sırada olduğunu vurğulayaraq, bu şəxsiyyətin Vyetnamın hərtərəfli inkişafına böyük töhfə verdiyini, bunun Vyetnam xalqının yaddaşından heç vaxt silinməyəcəyini deyib.
Sonra Azərbaycan guşəsində Heydər Əliyevin həyatı və siyasi fəaliyyəti, həmçinin onun şah əsəri olan Azərbaycanın sürətli inkişafı barədə videolar nümayiş etdirilib, Ulu Öndərin 1983-cü ildə Vyetnama rəsmi səfərini, sovet və müstəqil Azərbaycan dövrlərindəki fəaliyyətini əks etdirən fotosərgi təşkil olunub.
Səfirlik Heydər Əliyev və Azərbaycan haqqında geniş çeşidli kitabları universitetin kitabxanasına hədiyyə edib.
Şahin Cəfərov
AZƏRTAC-ın xüsusi müxbiri
Hanoy
Bölmənin digər xəbərləri
