“WeCom” tətbiqində “DeepSeek” bazalı “Dayuan” süni intellekti sınaqdan keçirilir
Bakı, 24 iyun, AZƏRTAC
Çinin “Tencent” texnologiya şirkəti məşhur “WeChat” tətbiqinin biznes versiyası olan “WeCom” korporativ mesajlaşma tətbiqində “Dayuan” süni intellekt agentini sınaqdan keçirməyə başlayıb.
AZƏRTAC “Bloomberg”ə istinadla xəbər verir ki, yeni süni intellekt köməkçisi artıq bəzi platforma istifadəçiləri üçün əlçatandır. O, “DeepSeek V4” modelinin bazasında işləyir və təbii dildə qarşılıqlı əlaqəni dəstəkləyir.
Şirkətin məlumatına görə, “Dayuan” qrup söhbətlərindən, elektron poçtdan və korporativ təqvimlərdən məlumatları təhlil edə bilir. Alətin şirkətlərə müştəri rəylərini daha effektiv şəkildə emal etməyə, ünsiyyəti yaxşılaşdırmağa və gündəlik iş proseslərini avtomatlaşdırmağa kömək edəcəyi gözlənilir. Xüsusilə, süni intellekt agenti gündəlik sənaye icmalları hazırlaya, həftəlik hesabatlar tərtib edə və digər təkrarlanan tapşırıqları yerinə yetirə bilir.
Yeni xidmətin istifadəyə verilməsi Çində süni intellekt bazarında artan rəqabət fonunda baş verir. “WeCom”, “Alibaba” şirkətinin “DingTalk” və “ByteDance” şirkətinin “Lark” korporativ platformaları ilə rəqabət aparır.
“WeCom”un üstünlüklərindən biri də “WeChat” ekosistemi ilə inteqrasiyası hesab olunur ki, bu da “Tencent” şirkətinə korporativ rəqəmsal xidmətlər bazarındakı mövqeyini gücləndirməyə imkan verir.
Bölmənin digər xəbərləri
