Xarici tələbələr hər il Gürcüstana 1,2 milyard lari gəlir gətirirlər
Tbilisi, 13 fevral, AZƏRTAC
Gürcüstanda təhsil alan xarici tələbələr hər il ölkə iqtisadiyyatına 1,2 milyard lari töhfə verirlər.
AZƏRTAC xəbər verir ki, bu barədə Gürcüstanın Baş naziri İrakli Kobaxidze məlumat verib.
Onun sözlərinə görə, xarici tələbələrin hesabına hər il Gürcüstan büdcəsinə təxminən 300 milyon lari əlavə vəsait daxil olur.
Bundan əlavə, Gürcüstanda onların hesabına 10 mindən çox iş yeri yaradılıb. Müvafiq olaraq, xarici tələbələr üçün proqramların ləğvi Gürcüstan iqtisadiyyatına, büdcəsinə və məşğulluq səviyyəsinə əhəmiyyətli dərəcədə zərər vuracaq.
Baş nazir deyib ki, Gürcüstanda 37 min əcnəbi tələbə təhsil alır ki, onların əksəriyyəti Hindistan vətəndaşıdır. Tələbələrin 7 faizi İordaniyadan, 6 faizi İsraildən, 5 faizi Sudandan, 3,3 faizi isə Pakistan, Böyük Britaniya və Misirdəndir. Bir əcnəbi tələbə ildə orta hesabla 15 min 500 lari təhsil haqqı ödəyir və ölkədə əlavə 16 min 300 lari xərcləyir.
"Onu da qeyd etmək lazımdır ki, tələbələr diplomlarını aldıqdan dərhal sonra ölkəni tərk edirlər. Müvafiq olaraq, onlar Gürcüstanın demoqrafik tərkibinin bir hissəsidir. İmic üçün heç bir risk yaratmırlar”, - deyə, hökumət başçısı bildirib.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
