“Xəmsə” intellektual oyunu üzrə Qax rayon birinciliyində “Uğur” komandası qələbə qazanıb
Qax, 5 mart, Mustafa Dadaşov, AZƏRTAC
“Xəmsə” milli intellektual oyunu üzrə 9-10 yaşlı məktəblilər arasında Qax rayon birinciliyinə yekun vurulub. Qax şəhər 4 saylı tam orta məktəbdə 9 komandanın iştirakı ilə keçirilən birincilikdə 45 məktəbli öz intellektual biliyini nümayiş etdirib. Yekun nəticələrə əsasən, Qax şəhər 2 nömrəli məktəb-liseyin “Uğur” komandası birinciliyin qalibi adını qazanıb. Qaxbaş kənd tam orta məktəbin komandası yarışı ikinci pillədə başa vurub. Şəhər 2 nömrəli məktəb-liseyin “Xəzər” komandası isə üçüncü yeri tutub.
Rayon Gənclər və İdman İdarəsindən AZƏRTAC-ın bölgə müxbirinə bildiriblər ki, ənənəvi olaraq hər il keçirilən bu yarışlar Azərbaycanın zəngin milli mədəniyyətini və tarixini təbliğ etmək, yeniyetmə və gənclərin intellektual səviyyəsini, dünyagörüşünü, zehni inkişafını stimullaşdırmaq, gənclər arasında bilik və elmin nüfuzunu artırmaq, eləcə də onların asudə vaxtlarının mənalı və səmərəli təşkilinə kömək məqsədi daşıyır.
Birinciliyin qalibləri diplom və hədiyyələrlə mükafatlandırılıblar.
Bölmənin digər xəbərləri
